ԵՐԵՎԱՆ, 1 դեկտեմբերի — Sputnik. ՀՀ վարչապետ Կարեն Կարապետյանի հանձնարարականի առաջին կետը վերաբերում էր դեղերի շուկային։
«Հաշվի առնելով, որ կեղծված, նմանակված, կոնտրաֆակտ դեղերի շրջանառությունը բացասական ազդեցություն կարող է ունենալ ՀՀ-ում դեղագործական ճյուղի զարգացման և շուկայում մրցակցային հարաբերությունների վրա` առողջապահության նախարարին հանձնարարում եմ երկշաբաթյա ժամկետում իրականացնել դեղերի ուսումնասիրություն, իրավական կարգավորումների վերլուծություն»,- ասաց վարչապետը։
Նա հանձնարարեց ուսումնասիրությունների արդյունքները ներկայացնել կառավարության աշխատակազմ։
Հաջորդ հանձնարարականով նախարարը պետք է ներկայացնի օրենսդրական փոփոխությունների փաթեթ, որով կկարգավորվեն բժշկական էթիկայի նորմերը։
«Բուժաշխատող-պացիենտ հարաբերություններում վստահության բարձրացման, հոգատարության մթնոլորտ ձևավորելու, իրազեկվածության մակարդակը բարձրացնելու նպատակով հանձնարարում եմ մշակել և 20-օրյա ժամկետում կառավարության աշխատակազմ ներկայացնել համապատասխան օրենսդրական փոփոխությունների փաթեթ»,- ասաց գործադիրի ղեկավարը։
Առողջապահության նախարարին ուղղված վերջին հանձնարարականն էլ վերաբերում էր բուժաշխատողների գնահատման համակարգ ստեղծելուն, ըստ դրա` կմշակվեն բուժաշխատողներին խրախուսելու տարբերակներ։
