ԵՐԵՎԱՆ, 1 մարտի — Sputnik. Եվրոպայի խորհրդի «Ազգային փոքրամասնությունների պաշտպանության մասին» շրջանակային կոնվենցիայի խորհրդատվական կոմիտեի հրապարակած զեկույցում նշվում է, որ բնակչության հիմնական մասի և ազգային փոքրամասնությունների միջև, ընդհանուր առմամբ, գերիշխում է հանդուրժողականության և երկխոսության մթնոլորտը:
Եվրոպայի խորհրդի խորհրդատվական կոմիտեն մարտի 1-ին երկու նոր կարծիք է հրապարակել Հայաստանի և Մոլդովայի մասին, որոնցում գնահատական է տրվել վերջին տարիների առաջընթացին, նաև խորհուրդներ` երկու երկրների կառավարություններին:
Եվրոպայի խորհրդի խորհրդատվական կոմիտեի համաձայն` Հայաստանում բնակչության հիմնական մասի և ազգային փոքրամասնությունների միջև, ընդհանուր առմամբ, գերիշխում է հանդուրժողականության և երկխոսության մթնոլորտ: Զեկույցում բարձր է գնահատվում այն փաստը, որ, չնայած տնտեսական դժվարություններին, Հայաստանն ավելի քան 20 000 սիրիահայ և սիրիացի է ընդունել, որոնք փրկվել են Սիրիայում ընթացող պատերազմից:
