ԵՐԵՎԱՆ, 28 փետրվարի — Sputnik. Հայաստանն առաջին երկիրն է, որի հետ փոխգործակցություն է հաստատել «Հայրենիքի պատմություն» ռուսական հիմնադրամը։ Երևան է այցելել հիմնադրամի գործադիր տնօրեն և կառավարման նախագահ, պատմական գիտությունների թեկնածու Կոնստանտին Մոգիլյովսկին։
«Պատմությունը միավորում է ամբողջ աշխարհի հայերին։ Հայ հասարակությանը հետաքրքրում է սեփական անցյալը», — ասել է նա։
Մոգիլյովսկու խոսքով` պատմության մեջ շատ առասպելներ և խեղաթյուրումներ կան։ Բայց կան թանգարաններ, արխիվներ, որոնք թույլ են տալիս հանրամատչելի դարձնել որակյալ գիտական գիտելիքները, այլապես այդ տեղը կզբաղեցնեն դիլետանտները կամ պատմությունը կեղծողները։
«Մենք կցանկանայինք, որ հայ երիտասարդությունը լիներ մշակութային հարթության մի մասը և հնարավորություն ունենա ծանոթանալ հայ-ռուսական հարաբերությունների ակունքների հետ», — ասում է ռուս պատմաբանը։
Հայ գործընկերների հետ համագործակցության առաջին փուլում ռուսական հիմնադրամի ղեկավարն առաջարկում է ստեղծել համատեղ աշխատանքային մարմին, որը կզբաղվի բազմադարյա հայ-ռուսական հարաբերությունների ուսումնասիրությամբ։
«Հայաստանում շատ լավ արխիվ կա։ Մենք պետք է մշակենք հիմնարար ձևակերպումներ, որոշենք առանցքային իրադարձությունները և պատմական գործիչների անունները, որոնք պետք է գիտական ոլորտից տեղափոխել հանրային տարածք», — ասում է Մոգիլյովսկին։
Երկրորդ փուլը կլինի համագործակցության գործնական իրագործումը։
Գիտնականների մշակած նյութերի հիման վրա կկազմակերպվի շարժական ցուցահանդես։ Այն կբացվի հաջորդ ուսումնական տարվա սկզբին Մոսկվայի պետական համալսարանի երևանյան մասնաճյուղում։
