ԵՐԵՎԱՆ, 27 փետրվարի — Sputnik. «Ումալաթ» ռուսական ընկերությունը պանրի կանոնավոր արտահանում է սկսել իրականացնել ԱՊՀ երկրներ, հայտնում է ՌԻԱ Նովոստին` հղում անելով ընկերությանը։
«Կանոնավոր մատակարարում է սկսել իրականացվել Հայաստան, Բելառուս և Ղազախստան, արտահանման ծրագիր է մշակվում դեպի Ղրղըզստան և Մոլդովա», — պատմել են ընկերությունում։
«Ումալաթն» արդեն անցել է հինգ պետությունների բոլոր անհրաժեշտ ընթացակարգերը`պանրի արտահանման համար, ինչպես նաև կատարել ներկրվող սննդամթերքի համար նախատեսված մի շարք երկրների սանիտարական և անասնաբուժական գերատեսչությունների պահանջները։
Ընկերությունում նշել են, որ ամենախիստ պահանջները դրել է Բելառուսը, որտեղ ստուգման բոլոր ընթացակարգերն անցնելը կազմել է ավելի քան կես տարի։ Վերահսկող մարմիններն առավել ուշադիր են ուսումնասիրել հատկապես ընկերության կաթնամթերքում բուսական բաղադրիչների պարունակության բացակայությունը, մասնավորապես` արմավենու յուղի։
Այսօրվա դրությամբ «Ումալաթի» արտահանման ընդհանուր ծավալը չի գերազանցում ընկերության արտադրանքի ընդհանուր ծավալի 5%-ը, սակայն արդեն 2017 թվականի վերջին պանիր արտադրող ընկերությունը մտադիր է այն կրկնապատկել` նոր շուկաներ դուրս գալու հաշվին։ «Ումալաթի» բաժնետեր Ալեքսեյ Մարտինենկոյի խոսքով` վերջին երկու տարիների ընթացքում ընկերությունը Ռուսաստանում վաճառքի ծավալներն ավելացրել է 25,5%-ով և նախատեսում է արտահանման ծավալներում ոչ պակաս աճ ցուցադրել։
Վերջին մի քանի տարիների ընթացքում ռուսական պանրի շուկայում զգալի փոփոխություններ են տեղի ունեցել. պանրի սեփական արտադրությունն աճել է 74% —ով` 2013 թվականին, 310 հազար տոննայից մինչև 547 հազար տոննա` 2015 թվականին։
