ԵՐԵՎԱՆ, 17 դեկտեմբերի — Sputnik. Երիտասարդ գործարարներ Վահրամ Միրաքյանն ու Հարություն Մնացականյանը որոշել են ճամբարակցիներին օգնել պանրի իրացման գործում: Նրանք ճամբարակցիներից գնում են ռոքֆոր տեսակի պանիրը, մշակում, փաթեթավորում և առաքում ցանկացողներին՝ 1 կիլոգրամը 3000 դրամով, այն դեպքում, որ պանրի այս տեսակը խանութներում գրեթե կրկնակի թանկ է։
«Տարբեր տեղերից գյուղացիներ մեզ դիմեցին, ասացին, որ չեն կարողանում վաճառել կամ տարել են, խաբել են, գումար չեն տվել: Փորձեցինք մենք մի բան անել, և ստացվեց»,- Sputik Արմենիայի հետ զրույցում ասաց Վահրամ Միրաքյանը:
Մեր զրուցակիցը նաև տեղեկացրեց, որ արդեն շուրջ 7 տոննա պանիր են ձեռք բերել գյուղացիներից և սկսել են դրա իրացումը: Որոշ մասը նույնիսկ արտահանել են ՌԴ:
Սնանկ ճանաչված «Աշտարակ կաթ» գործարանը 8 ամսվա աշխատավարձի պարտքի դիմաց նախկին աշխատակիցներին ու կաթ մթերող գյուղացիներին ռոկֆոր տեսակի պանիր է տրամադրում՝ 1կգ-ը 2000 դրամով: Ճամբարակցիները, սակայն, չեն կարողանում իրացնել պանիրը և գերադասում են պանիրն ի պահ թողնել գործարանի սառնարաններում:
Ընդհանուր առմամբ, գործարանը ճամբարակցիներին 40 տոննա ռոկֆոր պանիր է տրամադրել:
Նյութի ռուսերեն տարբերակը
