ԵՐԵՎԱՆ, 27 փետրվարի — Sputnik. Մոսկվայի և Սանկտ Պետերբուրգի բուհերը հայ ուսանողների համար ամենապահանջված ուսումնական հաստատությունների ցանկում են, Sputnik Արմենիա մուլտիմեդիոն մամուլի կենտրոնում ասաց Երևանում Գիտության և մշակույթի ռուսական կենտրոնի (ԳՄՌԿ) տնօրեն Մարկ Կալինինը։
Նրա խոսքով` շրջանավարտներն ընտրելու հնարավորություն ունեն. հայտում կարող են մինչև վեց համալսարան նշել։ Բացի այդ, Հայաստանի ուսանողները նախապատվություն են տալիս այն քաղաքներին, որտեղ մեծ հայկական համայնք կա։
Ամենակարևորը կրթությունն է
Ինչպես նշեց ԳՄՌԿ ղեկավարը, հայ ուսանողներից շատերը ընտրում են Ռուսաստանի հարավային հատվածում գտնվող բուհերը, սակայն բուհերի աշխարհագրությունը բավական մեծ է։
«Այս տարի մենք ավելի քան 500 հայտ ենք ստացել ռուսական առաջատար բուհերի բակալավրում, մագիստրատուրայում, օրդինատուրայում և ասպիրանտուրայում սովորելու համար։ Հայաստանի կրթության և գիտության նախարարության հետ համատեղ վերջին երկու շաբաթվա ընթացքում շրջանավարտների համար մրցույթներ են անցկացվել։ Մասնակիցները թեստեր են լրացրել ռուսաց լեզվից, ինչպես նաև մասնագիտական առարկաներից, հաշվի է առնվել ատեստատի միջին գնահատականը, և ներկա պահին մենք պատրաստ ենք «Կրթություն XXI դար» ցուցահանդեսի շրջանակում աշխատանքային խմբի նիստ անցկացնել թեկնածուներին ընտրելու համար», — ասաց Կալինինը։
Ռուսական բուհերում սովորելու համար թեկնածուների ընտրությունն ավանդաբար անցկացվում է «Կրթություն XXI դար» ցուցահանդեսի շրջանակում։
Որոշ մասնագիտությունների գծով մեկ տեղի համար հավակնորդների թիվը բավական մեծ է։ Օրինակ` «տնտեսագիտություն» մասնագիտության մրցույթում մեկ տեղի համար պայքարում է 30 դիմորդ, «իրավաբանություն» մասնագիտության մրցույթի համար` 20 դիմորդ, օրդինատորների մրցույթում 10 մարդ պայքարում է մեկ տեղի համար։
Ռուսական համալսարանների ասպիրանտուրաներում սովորել ցանկացողների թիվը նույնպես մեծ է։
Աշխատանքային խմբի նիստի շրջանակում ՀՀ կառավարության նիստերի դահլիճում բաց դռների օր կանցկացվի շրջանավարտների և նրանց ծնողների համար։
«Կրթություն XXI դար» ցուցահանդես
«Ինտեր էքսպո» ցուցահանդեսային ընկերության գլխավոր տնօրեն Ադելինա Քոչարյանն իր հերթին նշեց, որ ցուցահանդեսն անցկացվում է Հայաստանի կրթության և գիտության նախարարության աջակցությամբ։ Այս տարի միջոցառման գլխավոր հովանավորն է «ՎՏԲ-Արմենիա» բանկը։
«Մենք շնորհակալ ենք նաև Ռուսաստանի դեսպանատանը ցուցահանդեսի անցկացմանն աջակցելու համար։ Այս տարի մենք շատ հետաքրքիր ստենդ ենք ունենալու` պատմական արխիվ։ Ցուցադրվելու են Հայաստանի և Ռուսաստանի կրթության պատմությունը ներկայացնող արխիվային փաստաթղթերը` սկսած XVIII-XIX դարերից», — ասաց Քոչարյանը։
Նա ավելացրեց, որ ցուցահանդեսում կներկայացվեն միջին մասնագիտական կրթություն (քոլեջ), բարձրագույն կրթություն և հետբուհական կրթություն (այն ընկերությունները, որոնք տեղեր են հատկացնում մագիստրատուրաներում և ասպիրանտուրայում) առաջարկող հաստատությունները։ Բացի այդ, հնարավոր կլինի ծանոթանալ միջազգային կրթական ծրագրերին։
ՎՏԲ բանկի մանրածախ բիզնեսի զարգացման դեպարտամենտի տնօրեն Իվան Տելեգինը նշեց, որ «ՎՏԲ-Հայաստան» բանկի համար սոցիալական փոխգործակցության ոլորտի առաջնահերթ ուղղություններից է աջակցել երիտասարդ սերնդի ինտելեկտուալ զարգացմանն ու մասնակցել կրթական տարբեր ծրագրերին։
«Այսօր հաճելի է լինել «Կրթություն XXI» դար ցուցահանդեսի գործընկերը, որը նոր հնարավորություններ է բացում երիտասարդ, տաղանդավոր մարդկանց մի ամբողջ սերնդի համար, որոնք կրթություն կստանան լավագույն ռուսական բուհերում», — նշեց Տելեգինը։
Նա ավելացրեց, որ այս փորձը «ՎՏԲ Արմենիա» բանկին թույլ կտա հետագայում ևս մասնակցել նման նախագծերի։
