ԵՐԵՎԱՆ, 27 փետրվարի — Sputnik. «Լա Լա Լենդ» ֆիլմը ճանաչվեց տարվա լավագույն ֆիլմ և ստացավ «Օսկարի» բաղձալի արձանիկը։ Սակայն մի քանի րոպե անց հաղորդավարը հայտարարեց, որ սխալ է տեղի ունեցել, և իրականում գլխավոր մրցանակը նվաճել է Բարի Ջենքինսի «Լուսնի լույսը» ֆիլմը։
Այդ մասին հայտարարվեց Լոս Անջելսում ընթացող «Օսկարի» հանձնման 89-րդ արարողության ժամանակ։ Իսկ ահա Էմմա Սթոունը, որը «Լա Լա Լենդ» մյուզիքլում խաղացել է գլխավոր դերը, իսկապես «Օսկարի» արժանացավ «Լավագույն դերասանուհի» անվանակարգում։
«Շնորհակալ եմ Դեմիեն Շազելին, որ նա ինձ հնարավորություն տվեց մասնակցելու ֆիլմի նկարահանումներին, որոնք կհիշեմ ամբողջ կյանքում», — հայտարարեց նա։
Կնոջ լավագույն դերի համար մրցանակի հավակնորդներ էին նաև Իզաբել Յուպերը (Elle, «Նա»), Ռուտ Նեգան (Loving, «Լավինգ»), Նատալի Փորթմանը (Jackie, «Ջեքի») և Մերիլ Սթրիփը (Florence Foster Jenkins, «Ֆլորենս Ֆոսթեր Ջենքին»)։
Լավագույն դերասանի կոչմանը հավակնում էր նաև Ռայան Գոսլինգը, որը գլխավոր խաղացել է «Լա Լա Լենդ» ֆիլմում։ Սակայն հաղթեց Քեյսի Աֆլեքը «Մանչեսթերը ծովի մոտ» ֆիլմում խաղացած դերի համար։
