ԵՐԵՎԱՆ, 13 փետրվարի — Sputnik. Ամերիկյան ռեժիսոր Դեմյեն Շազելի «Լա Լա Լենդ» մյուզիքլը Կինոյի և հեռուստատեսության բրիտանական ակադեմիայի (BAFTA) վարկածով ճանաչվել է տարվա լավագույն ֆիլմ, հաղորդում է BBC Russian-ը։
Շազելը նաև արձանիկ է ստացել` որպես լավագույն ռեժիսոր։ Լավագույն դերասանուհի է ճանաչվել «Լա Լա Լենդում» հանդես եկած Էմմա Սթոունը։
Ականավոր բրիտանական ֆիլմի համար մրցանակի է արժանել Քեն Լոուչի «Ես` Դենիլ Բլեյքս» դրաման, որը պատմում է նպաստով ապրող մի տղամարդու մասին, որը հանդիպում է նման խնդիրներով միայնակ կնոջ։
Պարգևը ստանալիս ռեժիսորն ասել է. «Շնորհակալություն ակադեմիայի անդամներին` հասկանալու համար, թե ինչ է ուզում այս ֆիլմը. որ կառավարությունն անասելի դաժանությամբ է վերաբերվում խոցելի մարդկանց, և դա սարսափելի է։ Այդ դաժանությունը տարածվում է նաև այն փախստական երեխաների վրա, որոնց մենք խոստացել ենք օգնել, և դա հրեշավոր է»։
Լավագույն երաժշտության համար մրցանակ է ստացել «Լա Լա Լենդը» և նրա կոմպոզիտոր Ջասթին Հուրվիտցը, լավագույն մոնտաժի համար` Մել Գիբսոնի «Խղճի նկատառումներով» ֆիլմը, հագուստների լավագույն նկարիչ է ճանաչվել Մադլեն Ֆոնտեյնը, որն աշխատել է «Ջեքի» ֆիլմի հերոսների հագուստների վրա (Ջեքի Քենեդիի դերում հանդես է գալիս Նատալի Փորթմանը), լավագույն գրիմի համար մրցանակի է արժանացել «Ֆլորենս Ֆոսթեր Ջենքինսը», լավագույն ձայնային-օպերատորական աշխատանքի համար մրցանակը ստացել է «Ժամանում» ֆիլմը։
Երկրորդ պլանի լավագույն դերասանուհի է ճանաչվել Վիոլա Դևիսը։ Տղամարդու լավագույն դերի համար մրցանակը ստացել է Քեյսի Աֆլեկը, որը խաղացել է «Մանչեսթերը ծովի մոտ» ֆիլմում։ Երկրորդ պլանի լավագույն դերասան է ճանաչվել Դև Պատելը «Առյուծ» դրամայում ունեցած դերի համար։
Մրցանակաբաշխությունը տեղի է ունեցել Ալբերտ հոլում։ Երեկոյի հաղորդավարը եղել է դերասան և գրող Սթիվեն Ֆրայը։
