The Independent-ը չի բացահայտում պրոֆեսիոնալ գաղտնիքները, որոնց օգնությամբ այդ կասկածելի համբավ ունեցող տիկնայք կկախարդեն ԱՄՆ-ի նախագահին:
«Թրամփի դեմ ծեսի հրահանգը «թե՛ նորեկ, թե՛ փորձառու վհուկների համար հասկանալի տեսքով» կտարածվի սոցիալական ցանցերում: Արարողության մասնակիցներին հանձնարարվել է անցկացնել այն փետրվարի 24-ի կեսգիշերին և կրկնել այնքան ժամանակ, մինչև Թրամփը հրաժարական չտա»,- ասվում է հաղորդագրությունում:
Այդպիսով, մոգությամբ զբաղվողների աշխատանքային օրերը սպառնում են չնորմավորված լինել, բայց դա նրանց կամավոր ընտրությունն է, և արհմիություններն այստեղ անելիք չունեն:
Արդյո՞ք կցանկանա հայկական վհուկների և կախարդների միությունը մասնակցել միջոցառմանը. եթե այո, ապա ո՞ւմ օգտին, մեզնից կախված չէ: Հակասությունների հանդեպ ազգային հակումից ելնելով՝ այստեղ ամեն ինչի կարելի է սպասել:
Չար ուժի մշակների դրսևորած նախաձեռնությունը համընկել է նախագահ Թրամփի որոշման հետ. նա թույլ չի տվել ճեպազրույցին ներկա գտնվել այնպիսի հեղինակավոր հրատարակությունների լրագրողներին, ինչպիսիք են CNN, The New York Times, Los Angeles Times և Politico: Արդյո՞ք արժե ասել, որ եթե դավադրությունը հաջողությամբ պսակվի, ապա հենց այդ, այլ ոչ թե ուրիշ ԶԼՄ-ներն առաջինը կհաղորդեն նորությունը, և դժվար թե նրանք դա անեն ցավը սրտում:
Միաժամանակ, ռուս նահանգապետ Ալեքսեյ Պուշկովը, մեկնաբանելով Թրամփի որոշումը, Twitter-ի իր էջում գրում է. «Թրամփի դեմ լիբերալ ԶԼՄ-ների ագրեսիան և վարչակազմի պատասխան միջոցներն աննախադեպ են և կարող են հանգեցնել ԱՄՆ-ում տեղեկատվական քաղաքացիական պատերազմի»:
Ավելի վաղ ԱՄՆ-ի Սենատի զինված ուժերի հանձնաժողովի ղեկավար Ջոն Մակքեյնը մեղադրել էր Դոնալդ Թրամփին՝ բռնապետական հակումների մեջ:
«Բռնապետերը սկսում են մամուլին ճնշելուց: Իշխանությունն իրենց ձեռքում կենտրոնացնելու համար նրանք առաջին հերթին փակում են ԶԼՄ-ները: Ես չեմ ասում, որ Թրամփը փորձում է բռնապետ լինել: Ուղղակի, պետք է հիշել պատմության դասերը»,- ասել է Մակքեյնը:
Կարճ ասած՝ անորոշության վիճակը և կոնկրետության սպասումը շարունակվում է: Լքելով Սպիտակ տունը՝ Միշել Օբաման հույս է հայտնել, որ երկրի գալիք առաջին տիկինները կշարունակեն խնամել իր այգին:
Երևում է՝ այդպես էլ լինելու է. Մելանյա Թրամփը պատրաստվում է խնամել բանջարանոցը, որը գտնվում է ԱՄՆ-ի ամենահայտնի մարգագետնում, հաղորդում է Time-ը: Բայց դրա հիման վրա իշխանության հաջորդականության մասին խոսելը նույնքան դժվար է, որքան գուշակելը, թե ինչպիսի մաղադանոս է աճում Սպիտակ տան բանջարանոցում: Առավել ևս, որ գործի են անցել չար ուժերը:
