Հայերն աչքի են ընկել նաև այստեղ։ Ի տարբերություն այլ երկրների, որոնք զավեշտալի պայքարի մեջ են մտել ԱՄՆ–ից հետո աշխարհում երկրորդ տեղը զբաղեցնելու համար, հայ հումորիստները Հայաստանը ներկայացրել են որպես այլընտրանքային առաջին երկիր` առաջարկելով Թրամփին կիսել առաջին տեղը երկու երկրների միջև։ «Հայաստանը բազմադարյա պատմություն ունի. այն ավելի քան 7 հազար տարեկան է։ Դուք կսիրեք Հայաստանը, քանի որ մենք քրիստոնեություն ընդունած առաջին ազգն ենք աշխարհում», — ասվում է նամակում։ Բայց այդքանով հոլովակի հեղինակների ասելիքը չի ավարտվում, նրանք շարունակում են փաստարկներով բացատրել Թրամփին, թե ինչու հենց Հայաստանը պետք է ԱՄՆ-ի հետ կիսի առաջին տեղը։
Նրանք վստահեցնում են, որ եթե Դոնալդ Թրամփը քարտեզի վրա գտնի իրենց երկիրը, ապա կտեսնի, որ Հայաստանի սահմանների ուրվագիծը նման է նրա կնոջը` Մելանյա Թրամփին, իսկ դա, անկասկած, դուր կգա նախագահին։ Հումորիստները նշած մյուս առավելությունը Հայաստանում ԱՄՆ-ի ամենամեծ դեսպանատան առկայությունն է։ «Դե լավ, երկրորդը», — հումորով նշում է հեղինակը։
Չէ՞ որ Հայաստանում հարգում և սիրում են Թրամփին, իսկ դրա ապացույցը հունվարի 20-ին` ԱՄՆ նախագահի երդմնակալության արարողության օրը, 5 միլիոն հայերի դուրս գալն էր Երևանի փողոցներ։
Հասկանալի է, որ հումորիստները չափազանցնում են ոչ թե բուն փաստը, այլ թվերը, որպեսզի դուր գան նախագահին. Հայաստանում ապրում է մինչև 3 միլիոն հայ, Երևանում` մեկ միլիոնից ոչ ավել, իսկ հունվարի 20-ին առատ ձյան պատճառով փողոց էին դուրս եկել, հավանաբար, միայն ձյուն մաքրողները։ Հոլովակի հեղինակները որոշել են առաջ ընկնել Թրամփի մտքից և պատասխանել են հնարավոր հարցին` ինչու՞ հենց Հայաստանին պետք է ինքը տա առաջնությունը, չէ՞ որ տարածաշրջանում հայերը մենակ չեն։
«Ուշադրություն դարձրեք մեր հարևանին` Թուրքիային։ Պարոն նախագահ, Թուրքիան թռչուն չէ, այլ երկիր (turkey անգլերեն նշանակում է հնդկահավ` խմբ.)։ Թուրքիան այնքան մտացածին երկիր է, որ աշխարհին հայտնի է Ամերիկայի գոհաբանության օրվա խորհրդանիշով», — նշում են հոլովակի հեղինակները։
Կեղծ երկրների բաժնում հայ հումորիստները ներառել են նաև Վրաստանը, որն աշխարհին հայտնի է ոչ թե իր անունով` Սաքարթվելո, այլ ամերիկյան Ջորջիա նահանգի անունով։ Վերջում նշվում է, որ Հայաստանը և ԱՄՆ-ը վաղուց հարազատներ են, քանի որ հայերն իրենց քրոջը` Քիմ Քարդաշյանին ամուսնացրել են Ամերիկայի որդի Քանյե Ուեսթի հետ։
«Մենք ընդունում ենք, որ Դուք առաջինն եք, բայց մենք էլ արժանի ենք այլընտրանքային առաջինը լինելուն», — նշվում է հոլովակում։
ԱՄՆ-ի 45-րդ նախագահ Դոնալդ Թրամփի երդմնակալության ելույթը, որում նա ասել էր` Ամերիկան առաջին տեղում է, ծաղրի թեմա է դարձել։ Այս ելույթից հետո աշխարհի մի շատ երկրներում ֆլեշմոբ է սկսվել «Ամերիկան առաջինն է, ո՞վ է ուզում լինել երկրորդն» անվանումով։
Ֆլեշմոբի շրջանակում յուրաքանչյուր երկիր տեսաուղերձ է պատրաստում, որում պատմում է իր պետության առավելությունների մասին և ներկայացնում տեսարժան վայրերը։ Տեսահոլովակում հեղինակները խաղարկում են Թրամփի նախընտրական կարգախոսները` «Ամերիկան առաջին տեղում է», «Կրկին կհզորացնենք Ամերիկան», իսկ տեսանյութն ավարտվում է Թրամփին ուղղված ուղերձով. «Կարո՞ղ է արդյոք իրենց երկիրը երկրորդը դառնալ ԱՄՆ-ից հետո»։
Տեսաուղերձի նախաձեռնողը Նիդեռլանդներն է, որին հետևել է Գերմանիան` աշխարհի մյուս երկրներին կոչ անելով միանալ ։ Այսօր տեսահոլովակների թիվը գերազանցել է 20-ը, դրանց շարքում եվրոպական 17 երկիր կա, աֆրիկյան երկու երկիր` Մարոկկոն և Նամիբիան, ինչպես նաև Իրանը, Ավստրալիան և Վրաստանը։
