ԵՐԵՎԱՆ, 25 փետրվարի — Sputnik. Դաշինքի առաջին համաժողովին ներկա էին ու ելույթով հանդես եկան երեք ղեկավարներից երկուսը։ «Ժառանգություն» կուսակցության նախագահ Րաֆֆի Հովհաննիսյանը ներկա չէր և մակիցներին ողջունեց տեսաուղերձով, որում նշեց, որ գործնական հանդիպումներից հետո կվերադառնա ու կմիանա իր համախոհների պայքարին։
«Համախմբում» կուսակցության նախագահ Վարդան Օսկանյանն իր ելույթում անդրադարձավ ԼՂՀ խնդրին՝ նշելով, որ Արցախի ծողովուրդն ինքնորոշվել է 1991թ-ին, իսկ այսօր ժամանակն է այդ ինքնորոշման միջազգային ճանաչման։ «Հայաստանն ու Արցախն իրենց ժողովրդավարական չափանիշներով նույնիսկ համեմատության եզրեր չունեն Ադրբեջանի հետ»,- ասաց Օսկանյանը՝ նշելով, որ ուժեղ բանակ ունենալով արժանի ենք լինելու եվրոպական ընտանիքի լիարժեք անդամ դառնալու։
Դաշինքի ծրագրային հիմնական կետերն իր ելոույթում ներկայացրեց պաշտպանության նախկին նախարար Սեյրան Օհանյանը։ Նա անդրադարձավ Հայաստանի առջև ծառացած խնդիրներին՝ կոռուպցիա, աղքատություն, արտագաղթ, տնտեսական անկում։ Բայց իր խոսքում առավել կարևորեց և իր թիմակիցներին ու բոլոր քաղաքական ուժերին կոչ արեց քարոզարշավի ընթացքում շեշտը դնել ՀՀ Եվ ԼՂՀ անվտանգության խնդիրների վրա։
«Հասարակությանը չմղել պոպուլիզմի և անհիմն խոստումների թակարդը», — ասաց Օհանյանը։ Ապա ամբիոնից պատասխանեց իրեն ուղղված մեղադրանքներին, մասնավորապես՝ իշխանությունների հետ հարաբերություններին։
«Ես պաշտոնակռիվ երբեք չեմ արել», — ասաց նա՝ հավելելով, որ ստացել է բարձր պաշտոններ ստանձնելու առաջարկներ, բայց հրաժարվել է՝ իր կյանքի բարձրագույն պաշտոնը համարելով 25 տարի առաջ խրամատում կռվելը։ Իշխանությունների հետ իր հարաբերությունների մասին Օհանյանն ասաց, որ որևէ մեկի հետ անձնական խնդիր չունի, բարձր է գնահատում նրանց ջանքերը պետական կառավարման գործում, բայց այլևս իրեն այդ համակարգում չի տեսնում։ Համաժողովի ավարտին դաշինքի առաջնորդները շտապ լքեցին ՄՀՀ տարածքը՝ չցանկանալով պատասխանել լրագրողների հարցերին։
