ԵՐԵՎԱՆ, 24 փետրվարի — Sputnik. «Օսկանյան- Րաֆֆի- Օհանյան» դաշինքի թիվ մեկ խնդիրն է թույլ չտալ գործող իշխանությունների «ժառանգական տրանսֆորմացիան»։ Այսօր Sputnik Արմենիա մամուլի կենտրոնում, լրագրողների հետ հանդիպմանն ասաց «Ժառանգություն» կուսակցության վարչության անդամ «Օսկանյան-Րաֆֆի-Օհանյան» դաշինքի համամասնական դաշինքի 27-րդ համարը զբաղեցնող Անդրանիկ Գրիգորյանը:
Եվ քանի որ գործող նոր ընտրական օրենսգիրքը, նրա խոսքով, հնարավորություն է տալիս տեղ հասցնել ընտրողի ձայնը, ընդդիմությանն այլ բան չի մնում, քան տեր կանգնել ընտրողի տված քվեին:
«Ներկա օրենսգրքի շրջանակում ընտրողի ցանկության դեպքում ոչ ոք չի կարող վերահսկել նրա քվեարկությունը, և նա կարող է գաղտնիության պայմաններում կատարել այն: Քաղաքական ուժերի անելիքն այն է, որ ընտրողին ծանոթացնեն իր իրավունքներին»,- ասաց Անդրանիկ Գրիգորյանը:
Ապրիլի 2-ի ընտրություններից հետո նոր խորհրդարանում լինելու հնարավորությանը վերաբերող հարցին կուսակցության վարչության անդամը պատասխանեց, որ «Օսկանյան- Րաֆֆի- Օհանյան» դաշինքին կուսակցության միանալու որոշումն ընդունվել է հենց այդ համոզմամբ:
«Մեր շանսերը բավական բարձր եմ գնահատում, հատկապես եթե հաշվի առնենք, որ իշխանությունը քննադատության թիրախում է պահում «Օսկանյան- Րաֆֆի- Օհանյան» դաշինքը: Դա մեզ հավելյալ հույս է ներշնչում, որ մենք նրանց մրցակից ենք: Եթե նկատել եք, մնացած 7 կուսակցություններից ոչ մեկը նման թիրախում չի հայտնվում»,- ասաց Գրիգորյանը:
«Ժառանգություն» կուսակցության անդամը նույն հարթության մեջ է դիտարկում նաև պաշտպանության նախկին նախարար Սեյրան Օհանյանի նկատմամբ քրեական հետապնդում սկսելու սպառնալիքները: Բայց վստահ է, որ իշխանությունների այդ քայլը ևս ի վնաս ՀՀԿ-ի է աշխատելու:
