ԵՐԵՎԱՆ, 18 նոյեմբերի — Sputnik, Լաուրա Սարգսյան. Հայերը հայկական լեռնաշխարհի միակ բնիկ ժողովուրդն են, նրանք այլ տարածաշրջաններից չեն տեղափոխվել, կարծում է կենսաբանական գիտությունների դոկտոր, պրոֆեսոր Լևոն Եպիսկոպոսյանը։
«Նման եզրակացության եկել ենք հանգել Ղարաբաղում բազմաթիվ պեղումներ իրականացնելուց հետո։ Այնտեղ մենք ավելի քան տասը քարանձավ ենք ուսումնասիրել։ Նշեմ, որ դրանց թվում եղել են Ազոխի և Ալեքսանա Ղուզեի քարանձավները», — ասաց Եպիսկոպոսյանը։
Նրա խոսքով` բազմաթիվ մշակութային շերտերում հայտնաբերվել են նեանդերտալյան մարդու մնացորդներ, ինչպես նաև` ձկների ոսկորներ։ Սակայն, ի տարբերություն Ազոխի քարանձավների, Ալեքսանա Ղուզեի քարանձավում ԴՆԹ-ն ավելի լավ է պահպանվել։
«Այնտեղ մենք հայտնաբերել ենք մոտ յոթ հազար տարի առաջ Ղարաբաղի տարածքում ապրող մարդու ատամ։ Ինչպես հայտնի է, ատամի մեջ ԴՆԹ-ն կարող է պահպանվել դարերով», — նշեց Եպիսկոպոսյանը։
Գտածոն ոգեշնչել է հայ գիտնականներին հետագա ուսումնասիրություններ կատարելու համար։ Հայտնաբերված ատամի ԴՆԹ-ի կառուցվածքը պարզելու փորձագիտական ուսումնասիրությունները կատարվել են Կոպենհագենի գենետիկայի համալսարանում։
«Արդյունքում պարզվել է, որ մեր հեռավոր նախնիների գենը համապատասխանում է ժամանակակից հայի գենին», — ասաց Եպիսկոպոսյանը։
Սա ևս մեկ անգամ ապացուցում է, որ հայերն այլ տարածաշրջաններից չեն տեղափոխվել այստեղ, այլ Հայկական լեռնաշխարհի բնիկներ են։ Պեղումների իրականացման ժամանակ հայ գիտնականները 1997 թվականից սերտ համագործակցում են Ռուսաստանի, Իռլանդիայի, Պորտուգալիայի, Անգլիայի, ԱՄՆ-ի, Դանիայի և այլ երկրների մասնագետների հետ։
