ԵՐԵՎԱՆ, 23 փետրվարի-Sputnik. Քարինջ գյուղում երեխաները սովորում են «Աղուես», «Կրիայ» ծրագրերը, այլ կերպ ասած` սերտում են այն, ինչի մասին երևանաբնակ երեխաներից շատերն անգամ չեն լսել։
«Հիմնադրամի ՍՄԱՐԹ նախաձեռնությունը նպատակ ունի գյուղաբնակ երեխաներին ապահովելու կրթական նույն հնարավորություններով, որոնք ունեն քաղաքաբնակ երեխաները։ Այստեղ է, որ հիմնադրամի ու ԻՏՁՄ-ի ջանքերը միատեղվել են. COAF-ը տրամադրել է ենթակառուցվածքները՝ տեխնոլոգիայով հագեցած ՍՄԱՐԹ սենյակի տեսքով, ԻՏՁՄ-ն զբաղվել է ծրագրային ապահովմամբ՝ ի շահ երեխաների ու նրանց ապագայի»,- նշեց Հայաստանի մանուկներ հիմնադրամի ծրագրերի տնօրեն Էսթեր Հակոբյանը։
«Արմաթը» դպրոցական տարիքի երեխաների համար նախատեսված գիտակրթական լաբորատորիա է, որտեղ պետք է սովորեն ծրագրավորման, ռոբոտատեխնիկայի և մոդելավորման հմտություններ։
Կոնկրետ Քարինջի խմբակում 11-14 տարեկան 13 երեխա կա։ Շուտով նրանք կսկսեն ռոբոտներ հավաքել լաբորատորիայում առկա հավաքածուից, եռաչափ տպիչով և շաղափային հաստոցով անհրաժեշտ դետալներ կպատրաստեն։ «Աղուէս» և «Կրիայ» ծրագրավորման կրթական ծրագրերը սովորելու մատչելիության համար հայաֆիկացված են։
«Մենք կարևորում ենք մարզերում տեխնոլոգիական ժամանակակից կրթության ապահովումը, քանի որ այն իր հետ բերելու է նաև համայնքային ձեռներեցության զարգացում: Վստահ եմ, որ այս լաբորատորիայի սաներն առաջիկայում հանդես կգան իրենց ստեղծարար և մրցունակ գաղափարներով»,- ընդգծեց ԻՏՁՄ տնօրեն Կարեն Վարդանյանը։
Նույն օրը ռոբոտիկայի լաբորատորիա բացվեց նաև Դսեղի դպրոցի ստեղծագործարանում։
Տեղեկացնենք, որ Հայաստանի մանուկներ հիմնադրամը (COAF) բարեգործական կազմակերպություն է, որի նպատակն է՝ բարձրացնել Հայաստանի գյուղաբնակների կյանքի որակը համայնքային զարգացման երեխայակենտրոն ծրագրերի միջոցով:
Հիմնադրամի համակողմանի ծրագրային մոդելի իրագործումը սկսվել է 2004թ., և այդ ժամանակից ի վեր իրականացվում են կրթական, առողջապահական, սոցիալական և տնտեսական ծրագրեր, ինչպես նաև հիմնանորոգվում են համայնքների համար կենսական նշանակություն ունեցող ենթակառուցվածքներ: Այս ծրագրերի շահառուն է Հայաստանի Արմավիրի, Արագածոտնի, Լոռու, Գեղարքունիքի, Շիրակի և Տավուշի մարզերի 44 համայնքների ավելի քան 67000 բնակիչ:
