ԵՐԵՎԱՆ, 23 փետրվարի — Sputnik. Ադրբեջանը Եվրախորհրդարանի պատգամավորների նկատմամբ հետախուզում հայտարարելով՝ մարտահրավեր է նետում ամբողջ քաղաքակիրթ աշխարհին, ասաց ԱԺ փոխխոսնակ Էդուարդ Շարմազանովը:
«Վերջին ժամանակները Ադրբեջանը ոչ միայն խափանում է բանակցային գործընթացը, այլև իր անտրամաբանական գործողություններով մարտահրավեր է նետել ամբողջ քաղաքակիրթ աշխարհին: Ինչպես Լապշինի մութ գործարքը, այնպես էլ Արցախում անցկացվող հանրաքվեի նկատմամբ հիստերիկ և ոչ ադեկվատ վերաբերմունքը, սև ցուցակի ընդլայնումը, Եվրախորհրդարանի պատգամավորների նկատմամբ հետախուզում հայտարարելը` այս ամենը աբսուրդի ժանրից է»,- ասաց Շարմազանովը:
Նրա խոսքով՝ դրանք ծիծաղելի քայլեր են, և Ադրբեջանում արդեն ոչ թե սուլթան կամ խանություն է, այլ ինչ-որ ընտանեկան կառավարում: Շարմազանովը նշեց, որ չի զարմանա, եթե ապագայում այդ պետությունում առանցքային պաշտոնները զբաղեցնեն Ալիևների ընտանիքի մյուս անդամները:
Ֆրանկ Էնգելը (Լյուքսեմբուրգ), Յարոմիր Շտետինայը (Չեխիա) և Էլենի Թեոխարուսն (Կիպրոս) այցելել են Արցախի Հանրապետություն ու հետևել անցկացվող Սահմանադրական հանրաքվեին։ Ըստ ադրբեջանական ԶԼՄ-ների` Ադրբեջանը միջազգային հետախուզում է հայտարարել Եվրախորհրդարանի պատգամավորների նկատմամբ։
Ընդ որում, ՀՀ ոստիկանության տեղեկատվության, վերլուծության և ԶԼՄ-ների հետ կապի բաժնի ղեկավար Էդգար Ջանոյանը հայտնել է Sputnik Արմենիայի թղթակցին, որ ներկա պահին նշված պատգամավորները Ինտերպոլի կողմից միջազգային հետախուզման մեջ չեն գտնվում:
