ԵՐԵՎԱՆ, 23 փետրվարի-Sputnik. Հունվարի 1-ից ուժի մեջ մտած վիրավոր կամ հաշմանդամ զինծառայողներին աշխատավարձերից 1000-ական դրամ փոխանցելու մասին օրենքը գործում է, առաջին վճարումներն արդեն կատարվել են: Հիմնադրամի հոգաբարձուների խորհուրդը մի քանի օրից կներկայացնի որոշակի տվյալներ:
«Մենք շատ կարևոր խնդիր լուծեցինք, ձևավորեցինք մի գործիք, որով պետությունն ու հասարակությունը յուրաքանչյուր զինծառայողի վստահություն են ներշնչում, որ դժբախտ պատահարի, հաշմանդամության ձեռքբերման և մահվան դեպքում նրա ընտանիքի կողքին կանգնած կլինի ամբողջ ժողովուրդը»,- ասաց նախարարը՝ հիշեցնելով, որ հիմնադրամի գործունեությունը տարածվելու է հունվարի 1-ից հետո բանակում տեղի ունեցած դեպքերի վրա:
Նախարարը նշեց, որ մենք արդեն այսօր ունենք համակարգ, երբ զոհված սպայի կամ առաջին կարգի հաշմանդամություն ստացած սպայի ընտանիքը ստանալու է 82 միլիոն դրամ՝ 10 մլն առաջին վճարմամբ և, այնուհետև, յուրաքանչյուր ամիս 300 000-ական դրամ:
Շարքային զինվորների դեպքում աջակցությունը կազմելու է 52 մլն դրամ:
