ԵՐԵՎԱՆ, 22 փետրվարի — Sputnik. Հայաստանի ԶՈՒ պատրաստվածությունը զգալիորեն գերազանցում է «մարտական պատրաստվածություն» սահմանումը, ՌԻԱ Նովոստիին տված հարցազրույցում ասել է ՀՀ պաշտպանության նախարար Վիգեն Սարգսյանը։
«Հայաստանում կառավարման համակարգի որակը բավական բարձր է, Հայաստանի ԶՈՒ-ի սպայակազմը և բոլոր նրանք, ովքեր ներգրավված են զինված ուժերի կառավարման համակարգում, շատ լուրջ մարտական ուղի են անցել, ակադեմիական ռազմական կրթություն ունեն, և ես համոզված եմ, որ տարածաշրջանին ծանոթ փորձագետների համար գաղտնիք չէ, որ ՀՀ ԶՈՒ պատրաստվածության մակարդակը զգալիորեն գերազանցում է «մարտական պատրաստվածություն» սահմանումը»,- ասել է նախարարը։
Նրա խոսքով` պաշտպանության կազմակերպման գործում չափազանց կարևոր է նախապատվություն տալ ոչ թե քանակին, այլ որակին։
«Եվ դա, մասնավորապես, վերաբերում է սպառազինության գնման համակարգին, գործընկերների որոնման արդյունավետությանը և սպառազինության այն տեսակների կիրառմանը, որոնք ի զորու են ադեկվատ պատասխան տալ առկա ռիսկերին և սպառնալիքներին»,- ասաց Սարգսյանը։
