ԵՐԵՎԱՆ, 22 փետրվարի — Sputnik. Հայաստանը Ռուսաստանի հետ կշարունակի սպառազինություն ձեռք բերելու վերաբերյալ բանակցությունները, ՌԻԱ Նովոստիին տված հարցազրույցում հայտնել է ՀՀ ՊՆ ղեկավար Վիգեն Սարգսյանը։
«Պայմանագրային մի շարք կետեր ժամանակից շուտ են իրականացվել, և դա նույնպես ուրախալի է։ Մենք շարունակելու ենք ռուսական կողմի հետ մեր երկխոսությունը սպառազինության ձեռքբերման հնարավորության վերաբերյալ։ Հաշվի առնելով, որ ՀԱՊԿ-ի շրջանակում մենք զենքը ձեռք ենք բերում ռուսական բանակի ներքին գներով, և հաշվի առնելով արտոնյալ վարկերի առկայությունը, բնականաբար, նման գործակցության ներուժը մեծանում է։ Մենք շահագրգռված ենք դրանում»,- հայտնել է նախարարը։
Երևանը հայ-ռուսական պայմանագրի շրջանակում 200 մլն դոլարի արտահանման վարկ է ստացել զենք գնելու համար։ 2015 թվականին ստորագրած համաձայնագրով նախատեսվում է ռուսական արտադրության ռազմամթերք ձեռք բերել։ Համաձայնագիրը ստորագրվել է դեռևս 2015 թվականի հունիսի 25-ին, սակայն ուժի մեջ է մտել 2016 թվականի փետրվարի 10-ից։
