ԵՐԵՎԱՆ, 22 փետրվարի — Sputnik. Ադրբեջանական ղեկավարությունն ամեն ինչ անում է, որպեսզի լուծի երկրում վերջնական թյուրքականացման խնդիրը, պնդում է Ադրբեջանի քաղաքացի, ազգությամբ թալիշ Շահին Միրզոևը, որն ընտանիքով փախել է Բաքվից ու ժամանակավոր ապաստան է ստացել Հայաստանում:
«Ադրբեջանում թալիշ ժողովրդի նկատմամբ վարած քաղաքականությունն ակնհայտորեն կապված է այդ հանգամանքի հետ»,- ասում է նա։
Միրզոևի խոսքով` դրանով են պայմանավորված թալիշ բնակչության` քաղաքականապես ակտիվ ներկայացուցիչների հետապնդումներն ու առաջնորդների, բառի բուն իմաստով, վերացումը:
Նա պնդում է, որ երբ նման մի քանի դեպք ջրի երես են դուրս եկել, ու պարզվել է, որ մարդիկ ոչնչացվել են ադրբեջանական պաշտպանության նախարարության ձեռքով, պաշտոնական Բաքուն շատ ավելի զգույշ է դարձել ու հիմա հետապնդումներ կազմակերպելու հարցում ավելի նուրբ մեթոդներ է կիրառում, օրինակ` բժշկական ոլորտում:
«Թալիշ ազգի ներկայացուցիչների բժշկական սպասարկումն անչափ ցածր մակարդակում է, ու վերջին տարիներին բժշկական սխալի հետևանքով մի քանի անգամ ավելի շատ հիվանդ է վախճանվում»,- վստահեցնում է Ադրբեջանից Հայաստան փախած Միրզոևը`նշելով, որ անձամբ է նման վերաբերմունքի արժանացել իր քաղաքական ակտիվ դիրքորոշման համար:
Պատմում է, որ երբ կնոջը հիվանդանոց են տեղափոխել, հատուկ ծառայությունների ներկայացուցիչները նրան առաջարկել են նվազեցնել քաղաքական ակտիվությունը, այլապես «վատ կլինի»: Միրզոևը հրաժարվել է առաջարկից, որից հետո, նրա խոսքով, կնոջ բուժումն անչափ ցածր մակարդակի վրա է կազմակերպվել: Ադրբեջանական բժիշկներն էլ այնպես են ներկայացրել, որ վիրահատությունն անխուսափելի է։ Հետո միայն Երևանում, երբ տիկնոջը լիարժեք բուժում է ապահովվել, պարզվել է, որ նման հիվանդության դեպքում վիրահատությունը պարզապես հակացուցված է։
