ԵՐԵՎԱՆ, 15 փետրվարի — Sputnik. Հայաստանում ապաստան գտած Թալիշական ազգային շարժման ներկայացուցիչ Շահին Միրզոևը լրագրողների հետ հանդիպման ժամանակ ասաց, որ ադրբեջանական բանակում, հատկապես, առաջնագծում ծառայում են մեծամասամբ ազգային փոքրամասնությունների ներկայացուցիչները, որոնք կազմում են զինվորների 70-80 տոկոսը:
«Ադրբեջանական բանակում տեղացիները 20-30 տոկոսն են կազմում, ովքեր իրենց թուրքեր են անվանում։ Թալիշները ծառայում են առաջնագծում։ Նրանց ստիպողաբար բանակ են տանում ու միանգամից ուղարկում առաջնագիծ, մսաղաց։ Սա է պատճառը, որ սպանվածների թվում, անուններից էլ կարող եք հասկանալ, մեծամասամբ թալիշներն են, թաթերը, ուդիները»,- ասաց Շահին Միրզոևը։
Միրզոևի խոսքով` բանակում ծառայող ադրբեջանցիները հիմնականում առաջնագծում չեն, նրանք խոհարարներն են, պահեստներում են ծառայում և այլն։
Միրզոևը նշեց, որ Հայաստանում ինքն ու իր ընտանիքն իրենց լավ ու ապահով են զգում։
«Երեկոյան եկանք, միանգամից հաջորդ օրը կնոջս տեղափոխեցին հիվանդանոց, քանի որ օնկոլոգիական խնդիրներ ունի։ Հիմա նա բժիշկների հսկողության տակ է»,- նշեց նա:
Միրզոևը անհանգստանում է Ադրբեջանում մնացած 92-ամյա հոր համար, ում ստիպել են հրաժարվել սեփական որդուց։
