ԵՐԵՎԱՆ, 21 փետրվարի — Sputnik. Էդուարդ Շարմազանովի գլխավորած խորհրդարանական պատվիրակությունը մասնակցում էր ԼՂՀ-ում անցկացված սահմանադրական բարեփոխումների հանրաքվեի դիտարկմանը։ Լրագրողների հետ հանդիպման ժամանակ, սակայն, նա անդրադարձել է Ադրբեջանի կողմից կազմվող սև ցուցակներին։
«Ինչքան սև ցուցակներ են ավելացնում, այնքան մարդկանց և ազատ քաղաքացիների` ազատ և անկախ Արցախ այցելել ձգտումն ավելանալու է, և այսօրվա հանրաքվեն դրա վառ ապացույցն է»,- ասաց Շարմազանովը։
Լրագրողի հարցին՝ արդյո՞ք կա հարաբերությունների որոշակի սառեցում Բելառուսի ու Հայաստանի միջև, ՀՀ ԱԺ փոխխոսնակը նշեց, որ Բելառուսի դիրքորոշման վերաբերյալ հայտարարություններ եղել են նաև ավելի վաղ։
«Հայաստանի ռազմաքաղաքական ղեկավարությունը մեկ անագամ չէ, որ խոսել է այդ մասին»,- ասաց Շարմազանովը։
ՀԱՊԿ ներսում ընթացող տարաձայնությունների վերաբեյալ Շարմազանովը մասնավորապես պատասխանել է բլոգեր Ալեքսանդր Լապշինի գործով Բելառուսի դիրքորոշման հարցին:
«Հայաստանի ռազմաքաղաքական ղեկավարությունը բազմիցս է հայտարարել, այդ թվում՝ ՀԱՊԿ գագաթաժողովի ժամանակ նախագահի մակարդակով, որ կազմակերպությունում դաշնակիցներ կան, որոնք իրենց դաշնակցի նման չեն պահում: Այդ մասին նախագահը խոսեց ապրիլյան իրադարձություններից հետո»,-ասել է նա։
Ինչպես ՀԱՊԿ-ում, այնպես էլ ցանկացած կառույցում Շարմազանովը կարևորում է միասնականությունը։
«ՀԱՊԿ-ն միակ կառույցը չէ, որտեղ հակասություններ կան: ՆԱՏՕ-ում նույնպես հակասություններ կան, օրինակ՝ Թուրքիայի և Հունաստանի միջև»,-ասել է նա։
Իսկ Բելառուսի և Ադրբեջանի գործարքի մասին ԱԺ փոխխոսնակն ասել է` մութ գործարք է, որը չի համապատասխանում հակամարտության խաղաղ կարգավորման ոգուն։
