ԵՐԵՎԱՆ, 20 փետրվարի — Sputnik. Արդյո՞ք Հայաստանը կդիմի ՀԱՊԿ-ին, եթե Ադրբեջանը ռազմական ներխուժում ձեռնարկի։ Այս հարցը Հայաստանի արտգործնախարար Էդվարդ Նալբանդյանին է հղել ՌԻԱ Նովոստիի թղթակիցը։
Նախարարը հիշեցրել է, որ ՀԱՊԿ հիմնարար փաստաթղթում կա այդ հարցի հստակ պատասխանը։ Հավաքական անվտանգության մասին պայմանագրի համաձայն, եթե անդամ երկրներից մեկը ենթարկվում է ագրեսիայի, ապա դա կդիտարկվի որպես ագրեսիա պայմանագրի անդամ երկրների վրա, բնականաբար, դրանից բխող համապատասխան հետևանքներով։ «Չեմ կարծում, որ այս հարցով Դուք կասկածի տակ եք դնում ՀԱՊԿ շրջանակում ընդունած պարտավորությունները»,-ասել է Նալբանդյանը։
Անդրադառնալով ՀԱՊԿ-ի անդամ Հայաստանի ՆԱՏՕ-ի հետ համագործակցությանը` նախարար Նալբանդյանը նշել է, որ այդտեղ ոչ մի հակասություն չկա։ «Այո, մենք ՀԱՊԿ անդամ ենք, և ոչ միայն ակտիվ անդամ, այլ նաև դրա հիմնադիրներից մեկը։ Մենք ՆԱՏՕ-ի անդամ չենք, բայց բավական հաջող համագործակցում ենք` Անհատական գործընկերության գործողությունների պլանի շրջանակում։ Դրանով ամեն ինչ ասված է։ Ստվեր նետելու փորձերը բացարձակ անհիմն են»։
Էդվարդ Նալբանդյանը հավաստիացրել է` ովքեր փորձում են ստվեր նետել այս ամենի վրա, բոլորովին այլ նպատակներ են հետապնդում և իզուր։
