ԵՐԵՎԱՆ, 20 փետրվարի — Sputnik. Այն, որ ադրբեջանական կողմն անամոթաբար պարծենում է իր իբր հաջողություններով` լռելով կորուստների մասին, թողնենք նրանց խղճին: Այսպես է պատասխանել ՀՀ ԱԳՆ Էդվարդ Նալբանդյանը` Երևանը և Բաքուն տարբեր կերպ են գնահատում ղարաբաղյան հակամարտության գոտում ապրիլյան թեժացումը, ՌԻԱ Նովստիի թղթակցի հարցին։ «Չնայած ամեն ինչ գլխիվայր շրջելու Բաքվի իզուր փորձերին` բոլորի համար ակնհայտ է, թե ապրիլին ով է սկսել լայնածավալ ռազմական գործողությունները։ Միջազգային հանրությունը լավ գիտի այդ մասին, ներառյալ, անշուշտ, համանախագահ երկրները։ Իմ գործընկերները` տարբեր երկրների արտգործնախարարները, որոնց հետ ես խոսել եմ, չեն կասկածում, որ հենց Ադրբեջանն է սկսել ագրեսիվ գործողությունները»,-ասել է նախարարը։
Էդվարդ Նալբանդյանը նշել է, որ Ադրբեջանն իր ապակառուցողական մոտեցմամբ փակուղի մտցնելով բանակցային գործընթացը` դիմեց ռազմական արկածախնդրության, պատրանքներ տածելով, որ եթե նրան չի հաջողվել պարտադրել իր դիրքորոշումը խաղաղ բանակցությունների ընթացքում, ապա նա կարող է դա անել ուժի օգնությամբ։ «Եվ կրկին տապալվեց։ Այդ արկածախնդրության արդյունքը ոչ միայն մարդկային կորուստներն են, այլ նաև բանակցային գործընթացին լուրջ հարվածը»,-ասել է Նալբանդյանը։
Պատասխանելով բանակցային գործընթացի ճակատագրի վերաբերյալ հարցին` ՀՀ արտգործնախարարն ասել է. «Դեռ վաղ է մինչև կարգավորումը նման հարցադրումներ անելը, որը երկար տարիներ ձգձգվում է Ադրբեջանի պատճառով։ Նման կարծիքի են նաև համանախագահ երկրները։ Ի դեպ, այդ մասին ասվում է բոլոր աշխատանքային փաստաթղթերում, որոնք դրվել են բանակցությունների սեղանին։
Ինչ վերաբերում է փոխզիջմանը, ապա ԵԱՀԿ Մինսկի խմբի համանախագահներն իրենց հինգ հայտնի հայտարարություններում առաջարկում են հնարավոր փոխզիջում` ղարաբաղյան հակամարտության կարգավորման վերաբերյալ, որոնցից Բաքուն, մեղմ ասած, խուսափում է։ Եթե Դուք ծանոթ եք Բաքվի հռետորության հետ, ապա այնտեղ խոսում են վերջնագրերի լեզվով, այլ ոչ թե փոխզիջումների. ամեն ինչ կամ պատերազմ»։
Էդվարդ Նալբանդյանը ավելացրել է, որ Բաքուն ամբողջովին մերժում է միջազգային հանրության անունից համանախագահ երկրների առաջարկած փոխզիջումը։
