ԵՐԵՎԱՆ, 20 փետրվարի — Sputnik. Մեզ դուր չի գալիս, որ Ադրբեջանը զենք է գնում մեր դաշնակից Ռուսաստանից։ Այս մասին հայտարարել է ՀՀ արտգործնախարար Էդվարդ Նալբանդյանը` ՌԻԱ Նովոստիին տված հարցազրույցում։ «Այն դեպքում, երբ Ռուսաստանի Դաշնությունը, որպես Մինսկի խմբի համանախագահ երկիր, մեծ ջանքեր է գործադրում մեր տարածաշրջանում խաղաղություն և կայունություն պահպանելու համար»,-ավելացրել է նախարարը։
Անդրադառնալով տարածաշրջանում ստեղծված սպառազինության մրցավազքին` Էդվարդ Նալբանդյանն ասել է, որ Հայաստանը չէ, որ սպառնում է նոր պատերազմ սկսել, Հայաստանը չէ, որ պարծենում է իր ռազմական բյուջեով ու գնած զենքի քանակով, Հայաստանը չէ, որ խախտում է Եվրոպայում սովորական զինված ուժերի մասին պայմանագիրը։
«Ինչի՞ հանգեցրեց դա։ Մենք նախորդ տարվա ապրիլյան դեպքերի ականատեսը դարձանք, երբ Ադրբեջանի հրահրած ռազմական արկածախնդրությունն ուղեկցվեց միջնադարյան բարբարոսություններով, այդ թվում` խաղաղ բնակչության` երեխաների, կանանց, ծերերի նկատմամբ, միջազգային մարդասիրական իրավունքի կոպիտ խախտումներով»,-ասել է նախարարը։
Նալբանդյանի խոսքով` այդ պայմաններում մենք ստիպված ենք բոլոր ջանքերը ներդնել տարածաշրջանում ուժերի հավասարակշռությունը պահպանելու և նոր պատերազմ ու նոր թեժացում թույլ չտալու համար։
