ԵՐԵՎԱՆ, 19 փետրվարի — Sputnik. Երևանի Մնջախաղի պետական թատրոնը հիմնադրվել է 1974 թվականին, բայց մինչ օրս չուներ պետական տարածք: Օրեր առաջ հայտնի դարձավ, որ Մնջախաղի թատրոնն արդեն տանիք ունի՝ Դրամատիկական թատրոնի հարևանությամբ, Հայաստանի ազգային գրապալատի տարածքում: Մշակույթի նախարար Արմեն Ամիրյանը Sputnik ռադիոկայանի եթերում հայտնեց, որ դա համարում է ժամանակի ամենակարևոր լուծումներից մեկը:
«Մնջախաղի թատրոնն իրավամբ արժանի է ունենալու իր օջախը, իր անկյունը, և վստահ եմ, որ այդ անկյունը լինելու է մեր քաղաքի, մեր հայրենակիցների, մայրաքաղաք այցելած զբոսաշրջիկների համար ամենալուսավոր, ամենաջերմ և ամենատաք կետը»,-ասաց նախարարը:
Ամիրյանը թատերական կյանքից մեկ այլ նորություն էլ հայտնեց՝ «Ագուլիս» տիկնիկային թատրոնին ևս տարածք տրամադրվեց: Դա էլ Աբովյան 29 հասցեում՝ Եղիշե Չարենցի անվան գրականության և արվեստի թանգարանի շենքում:
«Երվանդ Մանարյանի թատրոնը նոր կյանք և նոր շունչ կստանա: Երկու թատրոնի վերածնունդ ենք արձանագրում, սա բոլորիս հաջողությունն է»,- ուրախությամբ նշեց Ամիրյանը:
Ինչ վերաբերում է թանգարաններին, ապա նախարարի նախաձեռնությամբ մի նոր ծրագիր կմեկնարկի: Համապատասխան ներդրողների շնորհիվ Հաղպատում կստեղծվի Սայաթ-Նովայի թանգարան:
«Մենք ձեռք կբերենք մի տարածք, որտեղ կտեղադրվեն այն բացառիկ նմուշները, որ այսօր գոյություն ունեն մեր հանրապետությունում, մասնավորապես՝ Սայաթ-Նովայի աթոռը, բազկաթոռը, որոշ ձեռագրեր և շատ հետարքրիր նյութեր: Մենք կփորձենք թանգարանը դարձնել հետաքրքիր մի վայր, որը կլինի այն լեգենդի շարունակությունը, որ Սայաթ-Նովան իր կյանքի վերջին տարիներն անցկացրել է Հաղպատում»,- ասաց մշակույթի նախարարը:
Թանգարանային հաջորդ ծրագիրն իրականացվել է Երևանում: Նախարարը ջանք ու եռանդ չի խնայի արվեստի գրավչությունը պահպանելով՝ կոմերցիոն թանգարաններ ստեղծելու համար: Օրինակ՝ շուտով Ազգային պատկերասրահի 9-րդ հարկում արվեստասերները հաղորդակից կդառնան արվեստին ու միաժամանակ կվայելեն հանգիստը:
«30 րոպեանոց կոնտենտի մեջ կցուցադրվեն հայ կերպարվեստի բացառիկ նմուշները հայ դասական երաժշտության բացառիկ նմուշների ուղեկցությամբ: Յուրաքանչյուր 30 րոպեն մեկ տեսանյութ կկրկնվի և կթարմացվի որոշ ժամանակը մեկ: Իսկ հարևանությամբ՝ պատշգամբներում, կգործեն սրճարաններ, որտեղ մարդիկ կկարողանան հանգստանալ, վայելել քաղաքի տեսարանը և նորից վերադառնալ դիտելու մեր կերպարվեստի բացառիկ նմուշները»,- ասաց Արմեն Ամիրյանը:
Նա չի կարծում, որ այսկերպ թանգարանները լիարժեք կկարողանան ինքնաֆինանսավորվել, բայց մի բանում վստահ է՝ կհաստատեն եկամտաբերության բարձր ցուցանիշներ:
Այցելուներ ներգրավելու հաջորդ կարևորագույն պայմանը, ըստ նախարարի, ցուցահանդեսներ անցկացնելու տեսանկյունից համաշխարհային փորձին հետևելն է:
«Մշակույթի կապիտալիզացիայի ոլորտից է նաև աուդովիզուալիզացիայի, վիրտուալ գիդերի ստեղծումը, որն այս պահին իրականացվում է Չինաստանի դեսպանատան 25 հազար դոլարի նվիրատվությամբ»,-ասաց նախարարը:
Արմեն Ամիրյանն այս բոլոր ծրագրերն արդիական ու նշանակալից է համարում, քանի ըստ նրա՝ ՀՀ քաղաքացին լավ ծանոթ չէ իր պատմությանն ու մշակույթին:
«Այսօր ՀՀ քաղաքացին չգիտի, թե մեր կերպարվեստն ինչ որակի, ինչ մակարդակի է, չի այցելել պատկերասրահ, Սարյանի տուն-թանգարան, որը, ի դեպ, ունի քանակի առումով բացառիկ, շատ մեծ այցելություններ, այնուամնեյանիվ, ՀՀ բնակչության զգալի մասը չի այցելել Սարյանի տուն-թանգարան»,- ասաց նախարարը:
«Կաղապարից դուրս» հաղորդման շրջանակում մշակույթի նախարարն անդրադարձավ նաև «Հայֆիլմ» կինոստուդիայի ճակատագրին:
«Կինոստուդիան սարսափելի վատ վիճակում է, տանիքը կաթում է, հատակը դուրս է գալիս, շարժական կոնստրուկցիաները շարքից դուրս են գալիս: Մենք հաշվարկներ իրականացրինք համապատասխան կազմակերպությունների հետ, տաղավարները վերանորոգելը և մի փոքր գրասենյակը նորոգելը կարժենա մոտ 150 միլիոն դրամ, որն այսօր ցավոք չունենք»,-ասաց նա:
Նախարարի խոսքով՝ համապատասխան ներդրումների դեպքում մշակույթի նախարարությունը կխնդրի, որ շենքն անցնի իրենց վերահսկողության տակ: Այս պահին պետգույքի կառավարման վարչության ներքո է: Արմեն Ամիրյանը հավաստիացրեց՝ շենքը պետք է ծառայի իր նպատակին, իսկ երկրորդ անգամ կառավարությունը սխալ չի գործի:
