ԵՐԵՎԱՆ, 17 փետրվարի — Sputnik. Կրկնակի օլիմպիական չեմպիոն, 23-ամյա Յանա Եգորյանի հայրը`Կարապետ Ալավերդյանը բնակվում է Երևանում։ Յանան չի տեսել նրան 17 տարի։ Ծնողները բաժանվել են, երբ նա վեց տարեկան է եղել։ Մայրն աղջկան տվել է իր ազգանունը, քանի որ Յանայի հոր հետ նրա ամուսնությունը գրանցված չի եղել։ «Էքսպրես Գազետա» հրատարակությանը տված հարցազրույցում մարզուհին պատմել է հոր հետ հարաբերությունների մասին։
«Նրան տեսնելու մեծ ցանկություն չունեմ։ Ինձ դաստիարակել է ոչ թե նա, այլ մայրս։ Երկար ժամանակ չեմ շփվել հորս հետ։ Առաջին անգամ խոսել ենք հեռախոսով, երբ ես 14 տարեկան էի։ Մենք շնորհավորում ենք միմյանց տոների, ծննդյան օրվա առթիվ», — պատմել է Եգորյանը։
Սուսերամարտուհին նշել է, որ ինչպես նախկինում, այսօր էլ նա հոր հետ չի հանդիպում։
Մի քիչ անձնականի մասին
Յանան հիմա հանդիպում է Ռուսաստանի ռապիրայի հավաքականի մարզիկ Թիմուր Սաֆինի հետ։ Թիմուրը 24 տարեկան է, նա ծնվել է Ուզբեկստանում` թաթարական ընտանիքում։ Ավելի ուշ նա ծնողների հետ տեղափոխվել է Ռուսաստան և հիմա ապրում է Ուֆայում։
Ռուսաստանի հավաքականի սուսերամարտիկների համար Յանայի և Թիմուրի ռոմանտիկ հարաբերությունները գաղտնիք չեն։ Ինչպես գրում է հրատարակությունը, Եգորյանը ճարպիկ աղջիկ է։ Երևում է` նա ոչնչից չի վախենում։ Ալպերում Եգորյանը թռչել է ուղղաթիռով, իսկ Մերձմոսկվայում թռչել է ճոպանով։
Ես շատ ընկերներ ունեմ Ադրբեջանում
Այն հարցին, թե արդյո՞ք Եգորյանը բացասական վերաբերմունք է զգում արտասահմանյան մարզիկների կողմից, նա պատասխանել է. «Այո, կա նման բան։ Մենք ապրում ենք այնպիսի սոցիումում, երբ մարդիկ վարժվել են ամբոխային մտածելակերպին։
Ես դեպքեր գիտեմ, երբ երկու հարևան երկրների սուսերամարտիկները երկար տարիներ ընկերություն են արել, իսկ հիմա ատում են միմյանց։ Դա հիմարություն է», — ասաց Եգորյանը։
Նրա խոսքով` այնտեղ` վերևում, ամեն ինչ որոշում են քաղաքական գործիչները, իսկ տառապում են սովորական մարդիկ։
«Բայց ես կարծում եմ, որ յուրաքանչյուր մարդ պետք է ունենա սեփական կարծիքը։ Ես ազգությամբ հայ եմ։ Այնպես է ստացվել, որ շատ ընկերներ ունեմ Ադրբեջանից։ Ես թքած ունեմ, որ Հայաստանն Ադրբեջանի հետ բարձր մակարդակում ինչ-որ խնդիրներ ունի։ Ում հետ կուզեմ, նրա հետ էլ ընկերություն կանեմ», — նշել է Եգորյանը։
Բացի այդ, Ռուսաստանի սուսերամարտի հավաքականի գլխավոր մարզիչն ադրբեջանցի է` Իլգար Մամեդովը։
