ԵՐԵՎԱՆ, 15 փետրվարի — Sputnik. Օլիմպիական կրկնակի չեմպիոն, 22-ամյա սուսերամարտիկ Յանա Եգորյանը զարմացրել է սպորտային աշխարհին` միանգամից երկու ոսկե մեդալ նվաճելով 2016-ի Ռիոյի օլիմպիական խաղերում։ Նման մարդկանց համար սովորաբար ասում են` ստվերից է դուրս եկել, գրում է Cosmopolitan ամսագիրը։ Յանան համաձայն է և կարծում է, որ հենց սպորտն է նրան տվել այն անկախությունը, որին միշտ ձգտել է։
Յանան վեց տարեկանում տեղափոխվել է մերձմոսկովյան Խիմկի քաղաք, դաստիարակվել է ավանդական հայկական ընտանիքի ոգով, բայց միշտ ձգտել է ձերբազատվել կոշտ կանոններից և պահանջներից։ Հենց այդ երազանքներն էլ Եգորյանին բերել են սուսերամարտի խմբակ։
«Ֆիզիկական պատրաստվածությունը մեծ ծախսեր է պահանջում։ Դու անդադար սուսերամարտում ես, աշխատում ես մարզիչիդ, գործընկերոջդ հետ, տեխնիկա ես մշակում, հղկում շարժումներդ։ Բացի այդ, դու պետք է ահռելի աշխատանք կատարես մարզասրահում` վազել, թռչել, լողալ։ Երբեմն դու բառացիորեն հոգնածությունից խեղդվում ես լողավազանում»,- ասում է Եգորյանը։
Համառ մարզումների շնորհիվ Յանան մի շարք հաղթանակներ է տարել միջազգային ասպարեզում և Ռիոյից վերադարձել երկու ոսկե մեդալով։
Բայց նա ամենից շատ հպարտանում է այն փաստով, որ հասարակ ընտանիքի աղջիկը, մեծ հնարավորությունների տեր չլինելով, կարողացել է լուրջ արդյունքների հասնել համառության և ձգտման շնորհիվ։ Հիմա Եգորյանն աշխատում է մարզասրահում, որտեղ սկսել է մարզվել փոքր հասակում։
