ԵՐԵՎԱՆ, 17 փետրվարի — Sputnik. Փետրվարի 20-ին Արցախում նախատեսված սահմանադրական հանրաքվեն ԵԱՀԿ ՄԽ համանախագահներն իրենց հայտարարությամբ համարել են Արցախի հասարակական կյանքի կազմակերպման միջոց: Sputnik Արմենիա ռադիոկայանի եթերում, վերլուծելով հայտարարությունը, ԼՂՀ նախագահի մամուլի քարտուղար Դավիթ Բաբայանն այդ միտքը համարեց հայտարարության մեխը:
«Սա մեր ներքին պետականաշինության գործընթացն է և լեգիտիմ է: Դրա համար էլ նրանք այդ մասին խոսում են: Եթե դա կատարվում է ժողովրդավարական հիմունքներով, ուրեմն լեգիտիմ է: Եվ նրանք, փաստորեն, այդ հայտարարությամբ ճանաչում են գործընթացի լեգիտիմությունը», — ասաց Բաբայանը:
Անդրադառնալով ՄԽ համանախագահների հայտարարության մեջ հիշատակված այն մտքին, որ հանրաքվեն որևէ առնչություն չունի Արցախի կարգավիճակի հետ, Դավիթ Բաբայանը նշեց, որ կիսում է այդ կարծիքը, քանի որ Արցախի կարգավիճակը որոշվել է դեռևս 1991-ի սեպտեմբերի 2-ին կայացած անկախության հանրաքվեով, և վերահաստատվել 1991թ-ի դեկտեմբերի 10-ին՝ համաժողովրդական հանրաքվեով:
«Այս հանրաքվեն որևէ ձևով չի փոխում մեր տեսլականը, և որևէ բան չի փոխվում մեր կարգավիճակում: Առավել ևս` որևէ կապ չունի ադրբեջանա-ղարաբաղյան հակամարտության հետ: Այսինքն՝ ընդհանուր առմամբ, այս տեսանկյունից համանախագահների հայտարարությունը լիովին համապատասխանում է իրականությանը»,- ասաց Դավիթ Բաբայանը:
Այդուհանդերձ, հայտարարության մեջ կան որոշ հատվածներ, որտեղ համանախագահները, Դավիթ Բաբայանի համոզմամբ, պետք է շատ ավելի հստակ ձևակերպեին իրենց միտքը: «Օրինակ, երբ խոսվում է ադրբեջանցի զինծառայողի դին վերադարձնելու մասին, և դա համարվում է կարևոր մարդասիրական գործողություն, այստեղ կարծում եմ, միաժամանակ պետք է նաև անդրադարձ կատավեր Լապշինի գործին»,- ասաց նա:
Հայաստանը, ըստ Բաբայանի, վերադարձնում է ոչ միայն զինվորի դին, այլև դիվերսանտին, ով եկել էր մեր երկրում հանցագործություններ կատարելու: Բայց, քանի որ, միջազգային բոլոր օրենքներով, մենք պարտավոր էինք դա անել, արեցինք:
Իսկ Ադրբեջանը բազմիցս հրաժարվել է վերադարձնել հայ զինծառայողների դիակները: Հիմա էլ, խախտելով բոլոր միջազգային նորմերը, Ադրբեջան է բերում ու ազատազրկում անմեղ մարդու, ում կյանքին հիմա վտանգ է սպառնում:
«Նման դեպքերը պետք է շատ հասցեական ու կոշտ արձագանք ստանան միջազգային հանրության կողմից»,- կարծում է Բաբայանը՝ համոզմունք հայտնելով, որ ԵԱՀԿ ՄԽ համանախագահներն իրենց հայտարարությամբ պարտավոր էին անդրադառնալ նաև Լապշինի գործին:
