Արմենուհի Մխոյան, Sputnik.
Ենթադրվում է, որ գյումրեցին ԱԺ առաջիկա ընտրություններին ավելի «դաժան» կգտնվի՝ հաշվի առնելով ստեղծված քաղաքական ֆարսը: Այսպես կոչված ռեյտինգային ցուցակներում հայտնված «ռեյտինգային» անձնավորություններից ու նախկինում տարբեր ափերում գտնվող, իսկ այս ընտրությունների համար միավորված դաշինքներից որպես ընտրակաշառք պատրաստ է պահանջելու մինչև 30 հազար դրամ՝ 1 ձայնի համար, բայց նույնիսկ այս դեպքում, ինչպես նախկինում, ոչ մեկը թող վստահ չլինի որ գյումրեցու ձայնը իրենով կանի:
«Իսկական անբարոյականի նման մեկ օրում կուսակցություն ու քաղաքական դիրքորոշում փոխեցին: Եթե իրարանցում կարող են սարքել, ուրեմն թող այնքան գումար առաջարկեն, որ մտածենք, բայց դե դա էլ հարցի լուծում չէ: Գիտենք, ԱԺ այս ընտրությունն էլ Գյումրիին ոչ աշխատատեղ կտա, ոչ էլ տնակներից կազատե»,-Sputnik Արմենիային ասացին գյումրեցիները:
Շիրակի մարզում ոչ միայն ընտրողներն են անկանխատեսելի, այլ նաև ընտրվողներն ու «ձայներ հավաքողները»: ԱԺ ընտրություններին նույն ցուցակի տակ կմասնակցեն Սուքիաս Ավետիսյանը, Արման Սահակյանը, Մարտուն Գրիգորյանը, Մուշեղ Պետոյանը և Շիրակի նախկին մարզպետ Ֆելիքս Ցոլակյանը։ Նրանց մեծ մասը ընտրական գործընթացի նախկին հակառակորդներ են:
Մարզում շատերի խաղաքարտերն այս անգամ խառնեց Գյումրու նախկին քաղաքապետ Վարդան Ղուկասյանը՝ հայտնվելով «Ծառուկյան» դաշինքի կազմում:
Ղուկասյանի «մատային» այս քայլն անհետևանք չէր կարող մնալ. նախկին ԲՀԿ-ական Մարտուն Գրիգորյանը հայտարարեց՝ չի կարող Վարդան Ղուկասյանի հետ նույն թիմում լինել, այդ իսկ պատճառով իր քաղաքական հակառակորդների՝ Արման Սահակյանի և Սուքիաս Ավետիսյանի հետ, հայտնվեց Հանրապետականի ցուցակում:
Այս տեղափոխությունից տուժեց ու ցուցակից դուրս մնաց Գյումրու գործող քաղաքապետ Սամվել Բալասանյանի որդին՝ Խաչիկ Բալասանյանը, ով ժողովրդի ասած «ջուրը դեռ չտեսած, բոբիկացել էր» ու մինչ այս, արդեն գործունեությունը գովազդող վճարովի հաղորդումներ էր պատվիրել: Արդյունքում՝ անիմաստ ծախսեր:
Ամեն դեպքում, գյումրեցիները վստահ են՝ սրանք դեռ այս ընտրական ինտրիգների բողբոջներն են:
