ԵՐԵՎԱՆ, 14 փետրվարի — Sputnik. Թուրքիայում Պոլսո Հայոց պատրիարքի սպասվելիք ընտրությունների գործընթացը գնալով բարդանում է։ Նախօրեին հայտնի դարձավ, որ եկեղեցական խորհրդի նախագահ Տ. Սահակ եպիսկոպոս Մաշալյանը հրաժարական է տվել ու Ստամբուլը լքելու մասին պաշտոնական հայտարարություն արել: Այս մասին գրում է «Ակօսը» պարբերականը։
Եպիսկոպոս Մաշալյանը նոր պատրիարքի պաշտոնի համար առաջադրված չորս թեկնածուներից մեկն էր։ Մյուս թեկնածուներն են Գերմանիայի հայ համայնքի հոգևոր առաջնորդ, արքեպիսկոպոս Գարեգին Բեկչյանը, Գուգարքի թեմի առաջնորդ, արքեպիսկոպոս Սեպուհ Չուլջյանը և փոխպատրիարք Արամ Աթեշյանը:
Մաշալյանն իր այս որոշման համար մեղադրել է փոխպատրիարք Աթեշյանին և հայտարարել, որ վերջինս ամեն կերպ խոչընդոտում է նախընտրական գործընթացն ու խախտում եկեղեցական կարգը:
Մաշալյանը, մասնավորապես, նշել է, որ պատրիարք Մութաֆյանին պաշտոնանկ անելու և պատրիարքի աթոռի պաշտոնապես թափուր մնալու մասին հայտարարությունից հետո օրենքով պետք է բարձրացվեր «տեղապահի» հարցը, իսկ Արամ Աթեշյանի՝ որպես փոխանորդ գործելու փաստն այդ որոշումից հետո այլևս անօրինական է:
Հրաժարական տված եպիսկոպոսը վստահ է, որ հենց Աթեշյանի մեղքով է նախընտրական գործընթացը ձգվում ամիսներ շարունակ, որը կանոնակարգի գործելու դեպքում առավելագույնը մի քանի շաբաթում պետք է ավարտին հասցվեր:
Նշենք, որ հոկտեմբեր ամսից ի վեր Պոլսո Հայոց պատրիարքարանն այդպես էլ չի ստացել Ստամբուլի նահանգապետարանի կողմից ընդունելության ամսաթվի վերաբերյալ պաշտոնական պատասխան:
«Ակօսին» տված հարցազրույցում Տ. Սահակ եպիսկոպոս Մաշալյանը հայտարարել է, որ պատրիարքի ընտրությունները ոչ միայն չեն անցկացվի նաև հանրաքվեից հետո, այլ նաև ՝ քանի դեռ Արամ սրբազանը գործում է որպես փոխպատրիարք՝ ընտրությունների անցկացումն իրատեսական չէ:
«Այս հին փլավը դեռ շատ անգամ են տաքացնելու ու դնելու զարմացած ժողովրդի առաջ, նրանք էլ ախորժակով ուտելու են: Ներեցեք, բայց իմ ստամոքսն արդեն չի տանում այս ամենը», — ասել է Մաշալյանը պարբերականի հետ զրույցում:
Հիշեցնք, որ պատրիարք Մութաֆյանը կոմայի մեջ է գտնվում 2008թ.-ից և փաստացի չի գործում որպես պատրիարք: Նրա փոխարեն այդ լիազորությունները կատարում է արքեպիսկոպոս Արամ Աթեշյանը, որն ընտրված է ոչ թե համայնքի, այլ պետության կողմից:
Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշումը՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի:
