ԵՐԵՎԱՆ, 14 փետրվարի — Sputnik. ՀՀԿ Գործադիր մարմնի նիստից հետո կուսակցության խոսնակ Էդուարդ Շարմազանովը ներկայացրեց Հանրապետական կուսակցության համամասնական ցուցակի առաջին 10 անձանց` նշելով, որ համամասնական ցուցակը բաղկացած է 64 ներկայացուցիչներից։
ՀՀԿ ընտրական ցուցակի առաջին տեղում Վիգեն Սարգսյանն է, երկրորդ տեղում` Երևանի քաղաքապետ Տարոն Մարգարյանը, երրորդը՝ արդարադատության նախարար Արփինե Հովհաննիսյանը: Հնգյակում են նաև պատգամավոր Արա Բաբլոյանը և մշակույթի նախարար Արմեն Ամիրյանը:
Շարմազանովի խոսքով` հնգյակը փոփոխության չի ենթարկվի:
Ցուցակի տասնյակում են նա Արմեն Աշոտյանը, Էդուարդ Շարմազանովը, Մարգարիտ Եսայանը, Սամվել Ֆարմանյանն ու Կարեն Ավագյանը:
Լրագրողների խնդրանքով մեկնաբանելով ՀՀԿ համամասնական ցուցակում ՀՀ նախագահի ու վարչապետի անունների բացակայությանը, Շարմազանովը նշեց.
«Կուսակցության նախագահն այդպես է որոշել»։
Ինչ վերաբերում է վարչապետ Կարեն Կարապետյանին, Շարմազանովն ակնարկեց, որ պատճառը վերջին 5 տարում ՀՀ մշտական բնակության բացակայությունն է։
Ըստ Շարմազանովի՝ ՀՀԿ-ն որոշել է, որ շտաբը պետք է ղեկավարվի Գործադիր մարմնի կողմից՝ նախագահ Սերժ Սարգսյանի գլխավորությամբ: «Գործադիր մարմինը կհամակարգի և կգլխավորի ՀՀԿ —ի նախընտրական քարոզարշավը ապրիլյան ընտրություններին»,-ասաց նա:
Շարմազանովը ևս մեկ անգամ նշեց, որ եթե ՀՀԿ-ն կառավարություն կազմի, ապա վարչապետը կլինի Կարեն Կարապետյանը:
