Լաուրա Սարգսյան, Sputnik.
Հայտնի ամերիկացի կինոպրոդյուսեր և ռեժիսոր Ջանեթ Գրիլոն առաջին անգամ է Հայաստանում։ Նրան ապշեցրել է այն, որ Հայաստանի նման փոքր երկիրը կարող է ունենալ նման հարուստ մշակույթ և պատմություն։
«Ես, իսկապես, զարմացած եմ Հայաստանի մասշտաբներով, քանի որ, երբ լսում ես նրա կամ հայերի մասին, մեծ երկիր ես ակնկալում տեսնել։ Իրականում ամեն ինչ այլ կերպ է և ակամայից հարց է ծագում, թե ինչպես նման փոքր երկիրը կարող է այդքան փառահեղ անուններ տալ»,- Sputnik Արմենիայի թղթակցի հետ զրույցում ասաց Գրիլոն, ավելացնելով, որ քաջատեղյակ է հայ ժողովրդի պատմության ողբերգական իրադարձության` Հայոց ցեղասպանության մասին։
Հայերի ջերմությունն ու հյուրընկալությունը հասցրել է զգալ դեռ վաղուց` շփվելով ԱՄՆ խոշոր հայ համայնքի ներկայացուցիչների հետ։
Գրիլոն մանկուց երազել է դերասանուհի դառնալ և զբաղվել թատերական գործունեությամբ. նրան միշտ ձգել է պոեզիայի աշխարհը, սակայն կյանքի բեկումնային շրջանում որոշել է փոխել իր աշխատանքն ու զբաղվել ռեժիսուրայով։
«80-ականներին, երբ ես 20-ն անց էի, Նյու-Յորքի բնակիչները գնահատում էին հեղինակային կինոն», — պատմում է Գրիլոն, նշելով, որ եթե ռեժիսոր չդառնար, կզբաղվեր հոգեբանությամբ, սակայն մեկն առանց մյուսի գոյություն չունի, քանի որ ռեժիսուրայում էլ հաճախ հոգեբանական հնարքներ ես օգտագործում։
Այսօր Գրիլոն Հայաստանում ներկայացնում է աուտիզմով հիվանդ երեխաների խնդիրների մասին պատմող «Jack of the Red Hearts» հոգեբանական դրաման։ Այս թեմային ռեժիսորը առաջին անգամը չէ, որ անդրադառնում է, այդ հիվանդությանն առնչվում է Գրիլոն։
«Ինձ հեշտ էր այս ֆիլմը նկարահանել, ես հասկանում եմ աուտիզմ ունեցողների ներքին վիճակը, քանի որ այդ հիվանդությամբ է տառապում նաև որդիս»,- խոստովանեց Գրիլոն։
Նրա խոսքով` որդու հետ զրույցները նրան շատ օգնեցին նկարահանման ընթացքում։ Գրիլոն դեռ ոչ մի հայկական ֆիլմ չի տեսել, սակայն խոստանում է, որ տուն վերադառնալուն պես կուսումնասիրի հայկական կինեմատոգրաֆիան։
Հայաստանում ամերիկյան կինոյի փառատոնն անցկացվում է երրորդ անգամ։ Փառատոնի շրջանակներում Երևանում, Գյումրիում և Վանաձորում 33 ֆիլմ կցուցադրվի։ Ամերիկյան կինոյի տոնը կշարունակվի մինչև մարտի 31-ը։
