Լաուրա Սարգսյան, Sputnik.
Գեղարվեստական ղեկավար և դիրիժոր Տիգրան Հեքեքյանի ղեկավարությամբ «Հայաստանի փոքրիկ երգիչներ» բացառիկ երգչախումբն աշխարհի բազմաթիվ բեմեր է նվաճել։ Անցյալ տարի Ճապոնիայում նրանց ելույթը և ճապոնական ազգային հեռուստատեսությամբ նրանց կատարումները երկար կհիշվեն բազմամիլիոնանոց ճապոնական լսարանի կողմից։
«Երբ նրանց տեսա հեռուստացույցով, միանգամից հասկացա, որ ցանկանում եմ այդ երգչախմբի պրոդյուսերը դառնալ և ձայնագրել նրանց կատարումները։ Նրանք ելույթ էին ունենում մեր երաժշտական հեռուստածրագրերից մեկում», — պատմեց Նագանոն։
Ճապոնացի Նագանոն կարծում է, իր Երևան գալը պատահական չէր, այլ կանխորոշված էր վերևից։ Փոքրիկ երաժիշտների կատարումը նա դասում է աստվածային կատարումների շարքին։ Դեռ Ճապոնիայում նրան գերել է հայ երեխաների առոգանության մաքրությունը, չէ՞ որ ճապոներեն այդպես չեն խոսում նույնիսկ որոշ լեզվաբաններ։ Հայաստանցի փոքրիկ երգիչները Ճապոնիայում արդեն մի շարք երկրպագուներ ունեն։
Նագանոն մտադիր է չորս օրվա ընթացքում իր թիմի հետ ճապոներեն շուրջ տասը երգ ձայնագրել։ Երգչախմբի փոքրիկ անդամները կկատարեն ամենահիթային ճապոնական երգերը։
Ծագող արևի երկրից ժամանած հյուրը ծրագրերում է նաև Հայաստանի մասին գովազդային տեսահոլովակ նկարահանել։ Նկարելու են հայկական բնապատկերներ` Գառնին, Գեղարդը, Երևանի տեսարժան վայրերը և այլն։ Ճապոնացի հյուրերը արդեն հասցրել են այցելել Մատենադարան, պատմության թանգարան, և շատ են զարմացել տեսածից։ Նրանք վստահ են, որ Հայաստանը քաղաքակրթության կենտրոնն է։ Ամենից շատ ճապոնացիներին Երևանում զարմացրել է մարդկանց բարությունն ու ժպտերեսությունը։«Երևանում քեզ հանգիստ ես զգում և չես կորցնում մարդկային կերպարդ, ինչը դժվար է անել Տոկիոյի, Օսակայի կամ Նյու Յորքի երկնաքերերի միջև։ Այստեղ անվտանգ է, իսկ օդն ու Արարատի տեսարանն անկրկնելի են», — խոստովանում է Նագանոն։
Ճապոնիայից ժամանած թիմն արդեն հասցրել է հայկական խոհանոցի ուտեստները համտեսել և բաղադրատոմսերի բարդության և բաղադրիչների մեջ ճապոնական խոհանոցի հետ նմանություններ է գտել։ Մի քանի օր հետո, Երևանից մեկնելիս, նրանք, անպայման, իրենց հետ կտանեն հայկական ջերմության մի մասնիկը` ուղևորության մասին հուշերն ու հուշանվերները։
