Շաբաթվա մարդիկ

Սերգեյ Բաբլումյան. Ավելի քան 40 տարի է՝ լրագրող է: Մանուկ հասակում երազել է դառնալ բռցքամարտիկ:

- Կցանկանայի չփոխվել. շարունակել ոչ ոքի չնախանձել և ապրել այնքան, որքան ստացվի:

Արտավազդ Եղիազարյան. Չնայած ծրագրավորողի դիպլոմին՝ 2006 թ-ից զբաղվում է լրագրությամբ: Մի քանի տարի աշխատել է ռուսերեն «Երևան» ամսագրի (журнал с акцентом!) թիմում, իսկ 2011-ից՝ հայալեզու «ԵՐԵՎԱՆ» քաղաքի ամսագրի գլխավոր խմբագիրն է:

- Մի քիչ էլ գրող եմ: Փոքր ժամանակ երազում էի դառնալ շատ լավ ամսագրի գլխավոր խմբագիր (լուրջ, երազում էի): Որոշ ժամանակ մտքիս կար հնէաբանությունը, բայց հասկացա, որ Հայաստանում դինոզավրերի կմախքներ դժվար թե կարողանամ պեղել:
Համոզված է, որ արդեն ժամանակն է երևանյան, մեր ժամանակը պատկերող վեպ ու սցենար գրել՝ կինոյի համար:

Ձեռնածու. Մեր ավտոմեքենան կանգ առավ Աբովյան-Սայաթ Նովա փողոցների խաչմերուկում՝ կարմիր լույսի տակ։ Այնտեղ էլ նկատեցինք ավտոմեքենաների արանքում ձեռնածություն անելով գումար վաստակող այս պատանուն։ Նա հետաքրքրեց մեզ, որոշեցինք ծանոթանալ, նույնիսկ արագ դուրս եկանք ավտոմեքենայից։ Բայց հասցրեցինք միայն լուսանկարել։ Լուսացույցի լույսը փոխվեց կանաչի։ Ստիպված եղանք շարունակել ճանապարհը։ Մեր ուղիներն այլևս չխաչվեցին։ Հուսանք, դեռ կհանդիպենք ու կծանոթանանք նրա հետ։ Իսկ մինչ այդ, կարծում ենք, մեր մասնագիտական հետաքրքրությունը ոստիկանությունը կների ու չի տուգանի՝ կարմիր լույսի տակ, երթևեկելի հատվածում ավտոմեքենայից դուրս գալու համար։

Դավիթ Հովհաննիսյան. Մասնագիտությամբ ռադիոտեխնիկ է, ավարտել է Հայաստանի պետական ճարտարագիտական համալսարանը: 2005թ-ից աշխատում է որպես բարմեն: 2007թ-ին վերապատրաստում է անցել բարմենների հայկական ասոցիացիայում:

-Վաղ հասակում ցանկանում էի դառնալ օդաչու: Երազում եմ արևադարձային որևէ երկրում սեփական բար ունենալու մասին:

Միքայել Ոսկանյան. Մասնագիտությամբ արվեստաբան Միքայել Ոսկանյանը 22 տարի է արդեն երաժիշտ-թառահար է, վերջին 6 տարիներին նաև՝ բենդլիդեր :

Երաժիշտ դառնալ երազել է դեռ մանկուց, բայց մանկական երազներում նաև ճարտարապետ ու ռեժիսոր դառնալու միտք կար:

-Ապագայում կցանկանայի ավելի զարգացնել այն , ինչը հիմա անում եմ:

Մենուա Կույումջյան. Մասնագիտությամբ դիզայներ է: Դիզայնով զբաղվում է շուրջ 5 տարի: Վերջին 2 տարվա ընթացքում հատկապես հետաքրքրված է բրենդինգով:

-Ապագայում կցանկանայի զբաղվել կոնցեպտուալ դիզայնով: Գրեթե չեմ ստում:

Րաֆֆի Մովսիսյան. Կինոքննադատ և կինոծրագրերի համադրող: 2012 թ-ից «Ոսկե ծիրան» Երևանի միջազգային կինոփառատոնի ծրագրերի համադրողն է: Կինոքննադատությամբ վաստակում է 2008թ-ից:

Փոքր տարիքում երազել է դառնալ խոհարար կամ բալերոն:

-Կինոխցիկի միջոցով ձերբազատվելու եմ մանկությանս ու երազներիս մասին այն բոլոր հիշողություններից, որոնցով ապրելը գնալով առավել դժվար է դառնում: