ԵՐԵՎԱՆ, 9 փետրվարի — Sputnik,Արմենուհի Մխոյան. «Անչափ ուրախ ենք, որ Անգելինան մասնակցում է «Ты супер!» նախագծին: Հաջողություն ենք մաղթում նրան ու մեծ հույս ունենք, որ Անգելինան պետք է կարողանա հաղթել, որովհետև ինքն ունի բեմական կեցվածք ու տեսք, իսկ ամենակարևորը՝ յուրահատուկ երգում ու պարում է, ինչին ականատես ենք եղել բազում անգամներ»,-Sputnik Արմենիային ասաց Շիրակի մարզպետարանի ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը:
Նա հույս է հայտնում, որ «Ты супер!» նախագիծը բեկումնային կլինի աղջկա կյանքում:
«Անգելինայի համար շատ ենք ուրախացել բոլորս: ՈՒզում ենք, որ նա կարողանա լուսավոր նայել ապագային ու մարտահրավեր նետողի աչքերով ասի՝ «ե՛ս էլ կարող եմ, ես արժեք ունեմ»»,-հավելեց Լիլիթ Գորգինյանը:
Փետրվարի 11-ին մեկնարկում է ՆՏՎ հեռուստաընկերության և Sputnik միջազգային տեղեկատվական գործակալության համատեղ «Ты супер!» նոր նախագիծը, որին կմասնակցեն մանկատների, գիշերօթիկ դպրոցների սաներ, ինչպես նաև որդեգրած երեխաներ։ Մրցույթին մասնակցում են երեխաներ Աբխազիայից, Ադրբեջանից, Հայաստանից, Բելառուսից, Վրաստանից, Մոլդովայից, Ղազախստանից, Ղրղըզստանից, Էստոնիայից, Հարավային Օսեթիայից և Ռուսաստանից: «Ты супер!» մրցույթն իրագործվում է Ռուսաստանի կրթության և գիտության նախարարության աջակցությամբ:
