ԵՐԵՎԱՆ, 8 փետրվարի — Sputnik. Դմիտրի Պեսկովը տեղեկացրել է, որ Ռուսաստանի և Իսրայելի քաղաքացի, բլոգեր Ալեքսանդր Լապշինի Բաքվից հետ վերադարձման թեմայով բանակցություններ չեն վարվում, բայց նրա անվտանգությունն ու պաշտպանության համար ձեռնարկվում են բոլոր հնարավոր իրավական միջոցները։ «Բանակցություններ այս պահին չկան, բայց ամեն ինչ արվում է Լապշինի անվտանգությունն ապահովելու համար»,-ասել է Պեսկովը լրագրողներին։
Պեսկովը հիշեցրել է, որ բլոգերը մի քանի երկրի քաղաքացի է, այդ թվում նաև` Ռուսաստանի։ «Մեզ համար նա մեր քաղաքացին է։ Մենք կշարունակենք պաշտպանել նրա շահերը` օրենքի սահմաններում»,-ասել է Պեսկովը։
Հիշեցնենք, որ Մինսկի ոստիկանությունը 2016 թվականի դեկտեմբերի 15-ին ձերբակալել է ՌԴ և Իսրայելի քաղաքացի Լապշինին, ով բնակվում է Մոսկվայում և գրում է ռուսերեն հեղինակավոր Travel Blog-ի համար: Նա Ադրբեջանի սև ցուցակում է հայտնվել 2011 թվականի ապրիլին, 2012 թվականի հոկտեմբերին և 2016 թվականի հունիսին Լեռնային Ղարաբաղ այցելելու, ինչպես նաև իր բլոգում Ադրբեջանի քաղաքականությունը քննադատելու համար: Ադրբեջանը 2011 թվականին նրան ներառել էր իր կողմից որոնվող անձանց ցուցակում:
Բելառուսի Հանրապետության գլխավոր դատախազի տեղակալը որոշում է կայացրել բավարարել Ադրբեջանի Հանրապետության գլխավոր դատախազության խնդրանքը՝ Լապշինին հանձնելու վերաբերյալ՝ Ադրբեջանի քրեական օրենսգրքի 281.2 և 318.2 հոդվածներով քրեական պատասխանատվության ենթարկելու համար։ Լապշինը բողոքարկել է դատախազության որոշումը, սակայն նրա բողոքը մերժվել է:
