ԵՐԵՎԱՆ, 8 փետրվարի — Sputnik. ՌԴ ԱԳՆ-ն հիասթափված է բլոգեր Ալեքսանդր Լապշինին Ադրբեջանին արտահանձնելու Մինսկի որոշումից, գրված է գերատեսչության կայքում:
«Ռուսական կողմը խորը հիասթափություն է հայտնում Ռուսաստանի և Բելառուսի միջև դաշնակցային հարաբերությունների ոգուն չհամապատասխանող տվյալ որոշման վերաբերյալ»,- գրված է ՌԴ ԱԳՆ կայքում հրապարակված հաղորդագրության մեջ։
Նշվում է, որ առկա տեղեկությունների համաձայն՝ փետրվարի 7-ին Բելառուսի Հանրապետության գերագույն դատարանը, փակ ռեժիմով քննելով գործը, չի բավարարել Ադրբեջան հանձնելու մասին Բելառուսի Հանրապետության գլխավոր դատախազության որոշման՝ Ռուսաստանի և Իսրայելի քաղաքացի Ալեքսանդր Լապշինի բողոքարկումը:
«Մտադիր ենք հետագայում ևս ձեռնարկել բոլոր անհրաժեշտ միջոցները Ռուսաստանի քաղաքացու իրավունքների և օրինական շահերի պաշտպանության ուղղությամբ՝ նրա շուտափույթ ընտանիք վերադարձի նպատակով»,- գրված է հաղորդագրության մեջ։
