ԵՐԵՎԱՆ, 8 փետրվարի — Sputnik. Կիևի որոշումն արցախյան ապրանքների առաքման վրա սահմանափակումներ դնելու մասին ընդհանուր ոչինչ չունի տնտեսական, սոցիալական կամ առողջապահական ոլորտների հետ, Sputnik Արմենիային ասաց ԼՂՀ նախագահի մամուլի խոսնակ Դավիթ Բաբայանը։
Ավելի վաղ տեղեկատվություն էր տարածվել, որ Ուկրաինան և Ադրբեջանը պայմանավորվել են ներմուծել Ղարաբաղում և Դոնբասում արտադրված ապրանքները միայն Կիևի և Բաքվի համաձայնությամբ։
Բաբայանի խոսքով` ղարաբաղյան արտադրանքը, լինելով էկոլոգիապես մաքուր, օգտակար առողջության համար, ունի նաև գնային առավելություն։ «Մենք կրկին տեսնում ենք քաղաքականության միջամտությունը։ Իհարկե, ուկրաինական իշխանությունների որոշումը հաճելի չէ, բայց տնտեսական տեսանկյունից հարվածն այդքան էլ զգալի չէ, որովհետև ղարաբաղյան արտադրանքն արտահանվում է ոչ միայն Ուկրաինա։ Այսինքն, Ուկրաինա արտահանվող արտադրանքի ծավալը կազմում է մեր արտահանման պոտենցիալի փոքր մասը։ Մենք արագ կփոխարինենք Ուկրաինան այլ շուկաներով։ Դա հնարավոր է անել, և մենք կանենք դա», — ասաց Բաբայանը։
Այն, որ ծախու քաղաքական որոշումները, քաղաքական բնույթի շահն ազդում են մարդկանց առօրյա կյանքի վրա, իսկապես խնդրահարույց է, կարծում է Բաբայանը։
Նրա խոսքով` ուկրաինացի սպառողները կզրկվեն որակյալ սննդամթերք ստանալու հնարավորությունից, իսկ երկրի իշխանություններին այդ հարցը, ամենայն հավանականությամբ, չի հետաքրքրում։
«Ցավոք։ Դա շատ վատ է, քանի որ, չնայած ամեն ինչին, եթե ապրանքները համապատասխանում են բոլոր չափանիշներին, ապա ինչ-որ քաղաքական ասպեկտների ուշադրություն դարձնելը սխալ է։ Առավել ևս, որ Ղարաբաղը երբեք թշնամական վերաբերմունք չի ցուցաբերել Ուկրաինայի հանդեպ։ Այնտեղ մեծ հայկական սփյուռք կա, այդ թվում նաև` շատ ղարաբաղցիներ», — ասաց Sputnik Արմենիայի զրուցակիցը` հավելելով, որ այդպես վարվելը սխալ է և պատիվ չի բերում ուկրաինական պետությանը։
Խոսքը պահածոյացված արտադրանքի, հյութերի և կոմպոտների մասին է։
«Դրանք էկոմթերքներ են, որոնք կարող են այդ հատվածում մրցակցել եվրոպական արտադրանքի հետ։ Ընդ որում, մեզ մոտ որակը բարձր է, գները` ցածր։
Մյուս կողմից, կարծում եմ, որ Ուկրաինայի այն քաղաքացիների համար, որոնք նախընտրում են մեր արտադրանքը, դա կարող է Արցախ այցելելու խթան հանդիսանալ, որտեղ այդ մթերքները հասանելի են ավելի ցածր գնով։ Ավելին, նրանք այստեղ կարող են հրաշալի արձակուրդ անցկացնել», — ասաց Բաբայանը։
Վերջում Բաբայանը հավաստիացրեց, որ Ղարաբաղում միշտ ուրախ են ընդունել զբոսաշրջիկների, քանի որ նրանք ինչ-որ առումով խաղաղության դեսպաններ են։
