ԵՐԵՎԱՆ, 8 փետրվարի — Sputnik. ՀՀ մարդու իրավունքների պաշտպան Արման Թաթոյանը երեկ Բրյուսելում հանդիպել է Եվրոպական Միության (ԵՄ) մի շարք բարձրաստիճան պաշտոնյաների հետ, որոնց թվում են Եվրոպական խորհրդարանի պատգամավոր Ֆրանկ Էնգելը, ԵՄ Հարեւանության եւ ընդլայնման հարցերով գլխավոր տնօրինության Հայաստանի, Ադրբեջանի, Բելառուսի եւ Արեւելյան գործընկերության հարցերով բաժնի ղեկավար Վասիլիս Մարագոսը։
Հարավային Կովկասի եւ Վրաստանի ճգնաժամի հարցերով ԵՄ հատուկ ներկայացուցչի հետ հանդիպման ընթացքում Արման Թաթոյանը բարձրացրել է Արցախի մարդու իրավունքների պաշտպանի՝ եվրոպական գործընթացներին մասնակից դարձնելու հարցը։
Նա նաև հատուկ նշել է լուրջ մտահոգությունը լրագրող Ա. Լապշինին Ադրբեջանին հանձնելու որոշման եւ դրա անթույլատրելի բացասական նշանակության մասին՝ ընգծելով, որ հիմա էլ ավելի պետք է ակտիվանան այցերը Արցախ:
Պաշտպանը նրան ներկայացրել է 2016 թվականի 29-ի, ինչպես նաեւ 2017 թվականի հունվարի 3-ի, 8-ի Չինարի գյուղի մոտակայքում Ադրբեջանի զինված ուժերի հարձակումների մանրամասները, պաշտպանի աշխատակազմի կողմից իրականացված փաստահավաք աշխատանքները, ինչպես նաեւ կազմված զեկույցը, այդ թվում՝ ձեռքբերված ապացույցներով։
