ԵՐԵՎԱՆ, 8 փետրվարի — Sputnik. ԱԺ պատգամավոր Վահան Բաբայանն իր ֆեյսբուքյան էջում արձագանքել է բլոգեր Ալեքսանդր Լապշինին Մինսկից Բաքվին հանձնելուն։
«Լապշինին հանձնելով մեր թշնամուն՝ պաշտոնական Մինսկը կատարեց բոլոր տեսակի միջազգային նորմերի խախտում և իրեն դուրս դրեց միջազգային իրավունքի սուբյեկտ լինելուց։
Սա դատապարտելի արարք է և մենք պետք է շատ խիստ գնահատական տանք Լուկաշենկոյին և իր վարչակազմին։
Պետք է դադարեցնել մեր դիվանագիտական հարաբերությունները այս ֆաշիստական երկրի հետ։ Կոչ եմ անում հետ կանչել մեր դեսպանին Բելառուսից»,- գրել է Վահան Բաբայանը։
ՌԴ և Իսրայելի քաղաքացի Ալեքսանդր Լապշինը, որը բնակվում է Մոսկվայում և վարում է հեղինակավոր Travel Blog-ը, ձերբակալվել էր 2016 թվականի դեկտեմբերի 15-ին Մինսկում:
2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին գրել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Ադրբեջանը դիմել է Բելառուսին՝ Լապշինին արտահանձնելու պահանջով: Բելառուսը բավարարել է Ադրբեջանի պահանջը։
