ԵՐԵՎԱՆ, 8 փետրվարի-Sputnik. Արտաշատի պոլիկլինիկայի տնօրեն Սերինե Հայրապետյանի պաշտպանության համար բուժանձնակազմը բողոքի ցույց է կազմակերպել Արարատի մարզպետարանի դիմաց։ Սերինե Հայրապետյանը լրագրողներից մեկի հետ զրույցում պատմել է, որ Արարատի նորանշանակ մարզպետ Արամայիս Գրիգորյանը մտադիր է եղել նրան աշխատանքից հեռացնել «հակաքարոզչությամբ զբաղվելու» համար։
Sputnik Արմենիայի հետ զրույցում Արտաշատի ԲԿ-ի տնօրեն Վարդան Հովհաննիսյանը հայտնեց, որ Արարատի մարզպետը հանդիպել է կոլեկտիվի հետ, զրուցել ու հարթել «թյուրիմացությունը»։
«Այս պահին հարցը կարգավորվել է, ընթացիկ որոշ բաներ կան, կճշտեմ ու մարզպետին կզեկուցեմ։ Բողոքի ցույց չի եղել, ոչ էլ մեղադրանքներ են հնչեցվել։ Նաև ասեմ, որ խնդիր չի եղել, որ կոլեկտիվը չի աշխատելու»,-ասաց Հովհաննիսյանը։
Արտաշատի ԲԿ-ի տնօրենը նաև ավելացրեց, որ պոլիկլինիկայի տնօրենի ազատման հրամանն ինքն է իրավասու տալ, իսկ ինքը նման բան չի արել։
«Եթե ես հրաման չեմ տվել, նա ինչպե՞ս է գործից ազատվել»,-ասաց նա։
Միաժամանակ Հովհաննիսյանը չհերքեց, որ բուժհաստատությունում որոշ խոսակցություններ եղել են, սակայն դրանց հիմքն է կեղծ եղել։
Հիշեցնենք, որ կառավարության նախորդ նիստի ժամանակ` փետրվարի 2-ին, հայտարարվեց, որ Արամայիս Գրիգորյանը նշանակվում է Արարարտի մարզպետ։ Նիստից հետո` լրագրողների հետ զրույցում, Արամայիս Գրիգորյանը հայտնեց, որ կադրային ջարդի մտադրված չէ, ով լավ աշխատի, կմնա իր տեղում։ Նա չհայտնեց նաև նախընտրական շրջանում իր գործունեության մասին։ Վերջում խոստացավ լրագրողների հետ հանդիպում կազմակերպել ու բոլոր հարցերին ամփոփ պատասխան տալ։
