ԵՐԵՎԱՆ, 2 փետրվարի — Sputnik. Արամայիս Գրիգորյանը նախկինում էլ էր ղեկավարում Արարատի մարզը։ Հետո նրան առաջարկեցին դառնալ բնապահպանության նախարար։ Հիմա Գրիգորյանը վերադառնում է «արմատներին» և խոստանում, որ ծառայելու է ժողովրդին։
«Ես ժողովրդին ծառա եմ գնում, աշխատել եմ այդ մարզում, ինձ բոլորը լավ են ճանաչում»,- ասաց նորանշանակ մարզպետը։
Հետո պատմեց` հենց այսօր է վարչապետից լսել մարզպետ դառնալու առաջարկը։
«Ես տեղյակ չէի, ինձ կանչեցին, ներկայացրին կառավարությանը, հրամանը տրվեց, որ աշխատեմ։ Ինձ հետ առավոտյան խոսեց վարչապետը, ես էլ համաձայնեցի»,-ասաց Գրիգորյանը։
Հարցին, թե նա նոր պաշտոնը ստանձնելով` կազատվի՞ աբրահամյանական կադրերից, Արամայիս Գրիգորյանը պատասխանեց` եթե լավ աշխատեն, կմնան իրենց տեղում։
«Բոլոր այն մարդիկ, որոնք կարողանում են աշխատել, պրոֆեսիոնալ իրենց գործունեությունը կանեն, հարգանք կվայելեն ժողովրդի շրջանում, կմնան ու կաշխատեն»,- ասաց նա։
Գրիգորյանը հորդորեց միասնականություն պահպանել սոցիալական խնդիրները լուծելու համար։ Այնուհետև խոստացավ` որոշ ժամանակ անց կներկայացնի` մարզում ինչ խնդիրներ կան և ինչպես պետք է լուծել դրանք։
