ԵՐԵՎԱՆ, 7 փետրվարի — Sputnik. Հայաստանը պետք է ձեռնարկի բոլոր հնարավոր քայլերը՝ ռուս-իսրայելացի բլոգեր Ալեքսանդր Լապշինին ազատելու հարցում աջակցություն ցուցաբերելու համար, Sputnik Արմենիային ասաց «Բարգավաճ Հայաստան» կուսակցության ղեկավար, ԵԽԽՎ հայկական պատվիրակության անդամ Նաիրա Զոհրաբյանը։
«Ես արդեն հանդես եմ եկել Եվրոպայի Խորհրդում Ադրբեջանին Լապշինի հանձնումը թույլ չտալու կոչով։ Մենք քննարկեցինք հարցը, ես անձամբ պաշտոնական նամակներ եմ ուղարկել տարբեր եվրոպական կառույցներ»,- ասաց Զոհրաբյանը։
Նրա խոսքով` դա բավականին ցավոտ նախադեպ է, որը միջամտություն է ենթադրում լրագրողի խոսքի ազատությանը։ Խորհրդարանականը հիշեցրեց, որ ԱՄՆ պետդեպարտամենտը նույնպես իր մտահոգությունն է հայտնել Լապշինին հանձնելու վերաբերյալ։
«Մենք պետք է ավելի խիստ դիրքորոշում զբաղեցնենք այս հարցի վերաբերյալ։ Անթույլատրելի է, որ միայն Լեռնային Ղարաբաղ այցելելու համար Ադրբեջանի «սև ցուցակում» հայտնված լրագրողը հանձնվի որպես հանցագործ»,- ասաց Զոհրաբյանը։
Նրա խոսքով` հարցն այժմ գտնվում է Եվրոպայի խորհրդի օրակարգում, և Հայաստանը պետք է անի հնարավոր ամեն ինչ՝ այն հնարավորինս արագ լուծելու համար։ Պատգամավորը, հաշվի առնելով Ադրբեջանի իշխանության տոտալիտար բնավորությունը, դժվարացավ ասել, թե ինչ է սպասում Լապշինին հանձնման պարագայում։
Բելառուսի գերագույն դատարանը ուժի մեջ է թողել ռուս-իսրայեացի բլոգեր Ալեքսանդր Լաշպինին Բաքվին հանձնելու մասին որոշումը։ Լապշինին ձերբակալել են Բելառուսում 2016 թվականի դեկտեմբերին՝ Ադրբեջանի հայցով, որտեղ նրա հանդեպ միջազգային հետախուզում էին հայտարարել Լեռնային Ղարաբաղ այցելելու համար։
