ԵՐԵՎԱՆ, 6 փետրվարի — Sputnik, Լաուրա Սարգսյան. Դեռ չէին հասցրել հանդարտվել 19-րդ դարի հայկական Շամխորեցոց Սուրբ Աստվածածին (Կարմիր Ավետարան) եկեղեցու շուրջ վեճերը, երբ փետրվարի 4-ին, Բաթումում փոթորիկի հետևանքով քանդվել է 1877թ-ի հայկական կաթոլիկ եկեղեցու տանիքը։
«Այն, որ եկեղեցին այսօր այդ վիճակում է, Վրաստանի կառավարության մեղքն է։ Նրանք ժամանակին պատշաճ ուշադրություն չեն դարձրել Վրաստանի կարևորագույն մշակութային հուշարձաններից մեկին», — կարծում է պատմական հուշարձանների պաշտպանության ակտիվիստ, «Բաթումի» հասարակական կազմակերպության հիմնադիր Շոթա Գուջաբիձեն։
Նրա խոսքով` չնայած ողբալի իրավիճակին, եկեղեցին դեռ կարելի է փրկել։ 2011թ-ից եկեղեցին Վրաստանի ուղղափառ եկեղեցու հովանու ներքո է, որը մինչև հիմա միջադեպի մասին պաշտոնական հայտարարությամբ հանդես չի եկել, սակայն արդեն հասցրել է հայտարարել է, որ հայկական կաթոլիկ եկեղեցու վերականգնման համար միջոցներ չունի։
Իր հերթին, ՀԱԵ-ն ահազանգում է և խնդրում երկրի իշխանություններին եկեղեցին վերադարձնել օրինական տերերին, քանի որ օրեցօր նվազում են եկեղեցու վերականգնման շանսերը։
«Տվյալ պահին մենք նամակներ ենք պատրաստել համապատասխան ատյաններ` Վրաստանի մշակույթի նախարարություն, Բաթումի քաղաքապետարան ուղարկելու համար։ Դրանցում մենք խնդրում ենք երկրի իշխանություններին աջակցել եկեղեցին մեզ հանձնելու գործում», — Sputnik Արմենիայի թղթակցի հետ զրույցում ասաց Սուրբ Փրկիչ եկեղեցու հոգևոր առաջնորդ, քահանա Արարատ Գումբալյանը։
Նա նշեց, որ հայկական եկեղեցին մտադիր է իր վրա վերցնել կաթոլիկ եկեղեցու վերականգնման և վերանորոգման հետ կապված բոլոր ծախսերը։
Եկեղեցին յուրահատուկ քրիստոնեական ժառանգություն է և Բաթում քաղաքի մշակութային հուշարձան։ Այն կառուցվել է 1877թ-ին, Բաթումի հայերի միջոցներով և երկար ժամանակ ապաստան է ծառայել կաթոլիկ հայերի համար։
Խորհրդային տարիներին եկեղեցին դադարել է կատարել իր գործառույթը, իսկ շենքը դարձել է մարզական դպրոց։
Կոնկրետ վիճակագրական տվյալներ չկան, թե քանի կաթոլիկ հայեր են բնակվում Բաթումում, սակայն հայտնի է, որ հիմնականում նրանք հաստատված են Նինոցմինդայում, Ախալքալակում, Ախալցխայում։
