ԵՐԵՎԱՆ, 2 փետրվարի — Sputnik. փետրվարի 1-ին Թալիշի հայկական դիրքերում գերեվարված Էլնուր Հուսեյնզադե Էլման օղլուն ոչ թե դասալիք ժամկետային զինվոր է, ինչպես փորձում են ներկայացնել Ադրբեջանի իշխանությունները, այլ պայմանագրային զինծառայող։
Այսօր համացանցում հայտնված տեսանյութում այդ մասին տեղեկացնում է նաև փետրվարի 1-ին Թալիշի հայկական դիրքերում գերեվարված դիվերսանտի մայրը։
ՀՀ պաշտպանության նախարարի մամուլի խոսնակ Արծրուն Հովհաննիսյանը ֆեյսբուքյան իր էջում տեղադրելով այդ տեսանյութը՝ ներկայացրել է ադրբեջանցի լրագրողի և գերու մոր զրույցը։
Էլնուր Հուսեյնզադե Էլման օղլու մոր հետ զրույցը, մասնավորապես, հետևյալն է.
«Զինվորական ծառայությունն ավարտելուց հետո վերադարձել էր տուն և չէր աշխատում: Չորս ամիս է, ինչ կամավոր ընդունվել է ծառայության: Երեկ գիշերը զանգահարել են ինձ զորամասից ժամը 01:30 սահմաններում և ասել, որ զորամաս չի եկել: Ես էլ ասացի, որ եկել է զորամաս, ոնց թե չի եկել: Այնուհետև ասացին՝ չէ չի եկել: Հետո էլ, թե՝ գերի է ընկել, ես էլ ասացի՝ որտեղից գիտես դու դա: Ասաց, որ համացանցում է գրված: Ես էլ ասացի՝ համացանցում գրված է, քո զինվորն է, քո մոտ է լինում, դու պետք է իմանաս ուր է գնացել, որտեղից է գալիս: Գիշերվանից որևէ նորություն չկա»:
