ԵՐԵՎԱՆ, 2 փետրվարի — Sputnik. Պաշտոնական Բաքուն փետրվարի 1-ի դիվերսիոն փորձից հետո հայտարարել է, որ հայկական ուժերի կողմից գերեվարված զինծառայողը պարբերաբար խախտել է զինվորական կարգապահությունը, ծառայության չի ներկայացել, իսկ հետագայում Զինված ուժերի շարքերից զորացրվել է և այժմ չի ծառայում Ադրբեջանի ԶՈւ-ում։ Արցախի նախագահի մամուլի խոսնակ Դավիթ Բաբայանը վստահեցնում է` Բաքվի իշխանությունը ֆաշիզմի և մարդատյացության քաղաքականությունը վարում է նաև սեփական ժողովրդի նկատմամբ, իսկ գերի ընկած զինվորից հրաժարվելու փաստը դրա ապացույցն է։
«Եթե այդ զինվորը զոհվեր, նրան անմիջապես հերոսների ու սրբերի շարքը կդասեին, Իլհամ Ալիևն ու նրա կինը կլացեին նրա հարազատների մոտ, ժողովրդին «կոգևորեին» հակահայկական տրամադրություններով»,- ասում է Բաբայանը։
Բայց քանի որ զինվորը գերի է ընկել ու ողջ մնացել, ապա ասում են, որ նա զինծառայող չէ, խախտել է զինվորական կարգապահությունը։
«Չես հասկանում` այդ մարդն ինչպե՞ս է հայտնվել դիվերսիոն խմբի կազմում։ Եկել է «Վերջին բնակիչը» ֆիլմի շնորհանդեսի՞ն»,- ասում է Բաբայանը։
Նա վստահեցնում է` պաշտոնական Բաքուն իր այս քայլով ևս մեկ անգամ ապացուցում է, որ Ադրբեջանն իր ահաբեկչական հանցավոր քաղաքականությունից չի հրաժարվում։
Բաբայանը նշում է նաև, որ գերեվարված զինծառայողի կյանքին ու առողջությանը որևէ վտանգ չի սպառնում։
«Ի տարբերություն Ադրբեջանի, մեր քաղաքակրթությանն ու մշակույթին խորթ է գերիներին խոշտանգելը, սպանելն ու օրգանները վաճառելը»,- ասաց նա։
Բաբայանը շեշտեց` գերիների նկատմամբ մենք դրսևորում ենք միջազգային մարդասիրական իրավունքի տառին ու ոգուն համապատասխան վերաբերմունք, և դա կարող են հաստատել միջազգային բոլոր կազմակերպությունները, այդ թվում` Կարմիր խաչի միջազգային կոմիտեն։
