ԵՐԵՎԱՆ, 2 փետրվարի — Sputnik. Հայաստանի ոստիկանությունը հանրությանը ներկայացրել է ուղեցույց, որը կանոնակարգում է ոստիկանների գործողությունները և վարքագիծն ընտրատեղամասերում։
Սահմանադրական փոփոխությունների հետ կապված` ոստիկանների պահվածքի կանոնները նույնպես շտկվել են։
Մասնավորապես, հրապարակվել է «Ընտրությունների ժամանակ ոստիկանության գործողությունների ուղեցույցը», որը ներկայացվել է լրագրողների և հասարակական կազմակերպությունների ուշադրությանը։
Ոստիկանության շտաբի պետ Հովհաննես Քոչարյանի խոսքով` այս կամ այն իրավիճակում քաղաքացիների դիրքորոշումը հաճախ տարբերվում է իրավապահ մարմինների դիրքորոշումից։ Ուղեցույցը պետք է հստակություն մտցնի։
«Այդ նախաձեռնության նպատակը համագործակցության համար վստահության մթնոլորտ ստեղծելն է։ Կարևոր է ներկայացնել ոստիկանների լիազորությունների սահմանները, որպեսզի նրանց գործունեությունը գնահատելիս տարաձայնություններ չլինեն»,- ասաց Քոչարյանը։
Իրավապահ կազմակերպությունների ներկայացուցիչներն օգտվեցին հնարավորությունից և հանդես եկան առանձին կետերի քննադատությամբ` առաջարկելով որոշակի փոփոխություններ մտցնել։
Մասնավորապես, Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը դժգոհ է, որ ուղեցույցի մեծ մասը նվիրված է ոստիկանների գործողություններին անմիջականորեն ընտրությունների օրը` անտեսելով նախընտրական շրջանը։
Նա կոչ արեց ուշադրություն դարձնել անցյալում տեղ գտած դեպքերին` կապված քաղաքացիների տեղաշարժման իրավունքը սահմանափակելու, ընտրողների հետ հանդիպումները խոչընդոտելու հետ։
Նրա խոսքով` անհրաժեշտ է խիստ հսկողություն սահմանել նաև քրեորեն հետապնդելի արարքների նկատմամբ, այդ ուղղությամբ անհրաժեշտ է հետևողականություն ցուցաբերել, մասնավորապես, ընտրակաշառքների վերաբերյալ:
«Ուղեցույցը պետք է արտացոլի բոլոր խնդիրները, որոնք ծագել են նախորդ ընտրությունների ընթացքում, ինչպես նաև առաջարկի դրանց լուծման մեթոդները»,- ասաց Սաքունցը։
Սաքունցի կարծիքով` պատշաճ ուշադրություն չի հատկացվել նախընտրական շտաբերին, որոնք հաճախ տրանսպորտ են տրամադրում քաղաքացիներին ընտրատեղամաս տեղափոխելու համար, դրանով հանդերձ ՝որոշակի ազդեցություն ունենում նրանց ընտրության վրա։
Քննարկմանը մասնակցում էր նաև «Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանը։ Նա ցանկանում է, որ ապրիլի 2-ին կայանալիք խորհրդարանական ընտրություններին բացահայտումներ ավելի շատ ոստիկաններն անեն, քան դիտորդներն ու լրագրողները։
Դանիել Իոաննիսյանն առաջարկեց կոնկրետ շտկումներ մտցնել ուղեցույցի որոշ կետերում, մասնավորապես, պազրաբանել ոստիկանների լիազորությունները և պարտականություններն ընտրատեղամասերում։
Քոչարյանը հիմնականում համաձայնեց առաջարկությունների հետ` խոստանալով փոփոխություններ մտցնել սկզբնական տարբերակում։
