ԵՐԵՎԱՆ, 23 հունվարի — Sputnik. «Կոնտինենտտեքս» ՓԲԸ-ի նախկին աշխատակիցները, չստանալով պետության աջակցությունը, դիմել են ԶԼՄ-ներին` հույս ունենալով ստանալ ութ ամսվա աշխատավարձը։
Նրանք նշեցին, որ կարի ֆաբրիկան պարտքեր է կուտակել այն բանից հետո, երբ տնօրենի պաշտոնում Աշոտ Ավետիսյանին փոխարինել է Սամվել Բեկչյանը։ «Կոնտինենտտեքսի» նախկին աշխատակցուհի Գոհար Թամամյանը պատմեց, որ 1967թ-ից գործող ֆաբրիկան 2013թ-ի հոկտեմբերի 31-ին լուծարվել է։
«Մենք տարբեր դռներ ենք թակում` մեր աշխատավարձը ստանալու համար։ Մենք հանդիպել ենք ՆԳՆ աշխատակիցների, պաշտոնյաների հետ և ոչ միայն։ Ոչ ոք չի ասում, որ մենք չենք ստանա աշխատավարձը։ Բոլորը հավաստիացնում են, որ «ձեր փողերը կտան»։ Մենք նույնիսկ կոլեկտիվով դիմել ենք դատարան։ Վճռի համաձայն, մեզ աշխատավարձ կտան կարի ֆաբրիկային պատկանող ունեցվածքի վաճառքից հետո»,- նշեց Թամամյանը։
Նրա խոսքով` ոչ մի ունեցվածք չկա, այնտեղ ընդամենը մի քանի անպետք իրեր կան, որոնց համար սահմանվել է չափազանց բարձր գին։
«Ո՞վ կգնի այդ ամենը, երբ մարդիկ հացի փող չունեն։ Մեզ ասացին, որ ընկերությունը պարտք է հարկային ծառայությանը և պետք է վճարի 53 միլիոն դրամ ու դրանից հետո միայն՝ աշխատողների պարտքերը»,- ասաց «Կոնտինենտտեքսի» նախկին աշխատողը։
Ֆաբրիկան որոշ ժամանակ աշխատել է առանց պարտքերի։
«Ասում են, որ Բեկչյանը հետախուզման մեջ է։ Տարօրինակ է, որ երեք տարվա ընթացքում չի հաջողվել գտնել նրան։ Նա մարդ է, ոչ թե ասեղ»,- նշեց Թամամյանը։
Նա հավելեց, որ մինչև փակվելը գործարանը նորմալ աշխատել է։ Դրանից մի քանի ամիս առաջ խոշոր պատվեր էր ստացվել` իրավապահ մարմինների աշխատողների համազգեստը կարելու համար։
«Մենք կատարել ենք մեր աշխատանքը, աշխատողները բառացիորեն պոկել են իրենց աշխատավարձը, իսկ դերձակները և ադմինիստրացիան աշխատավարձ չեն ստացել», — ասաց Թամամյանը։
Իր հերթին Հայկանուշ Գալստյանը նշել է, որ աշխատավարձի պարտքերը գոյացել են այն ժամանակ, երբ ձեռնարկությունը պետական է եղել։
«Երբ մենք դիմեցինք ոստիկանություն, մեզ ասացին, որ կառույցը գտնվում է ողբալի վիճակում, փող չկա»,- ասաց Գալստյանը։
Նրա խոսքով` աշխատակիցներին զայրացրել է այն, որ նրանք մի քանի անգամ բողոքի ակցիա են կազմակերպել կառավարության շենքի մոտ, բայց ոչ մեկը տեղից չի շարժվել և չի հարցրել, թե ինչու են այդ կանայք այստեղ կանգնած և ինչ են ուզում։
«Կոնտինենտտեքս» ՓԲԸ-ը 1995թ-ից կարել է Հայաստանի ՆԳՆ և ոստիկանության աշխատողների համազգեստը։ Ընկերությունը սնանկ է ճանաչվել և լուծարվել 2013թ-ի հոկտեմբերին։
Սամվել Բեկչյանը ՊԵԿ քննչական բաժնում հարուցված գործի շրջանակում դիտարկվում է որպես մեղադրյալ։ Նրան մեղադրանք է առաջադրվել Հայաստանի ՔՕ 193 հոդվածով և 205 հոդվածի առաջին մասով՝ վտանգավոր հասարակական գործողությունների համար։
