ԵՐԵՎԱՆ, 1 փետրվարի — Sputnik. Ռուսաստանում և մի շարք երկրներում Նատալիա Օրեյրոյի և Էրոս Ռամազոտիի համերգների կազմակերպիչների` «Глобальные коммуникации» կազմակերպության նկատմամբ Մոսկվայի արբիտրաժային դատարանի հրամանով սնանկ ճանաչելու գործընթաց է սկսվել։
Համապատասխան պահանջով հայտ է ներկայացվել անհատ ձեռներեց Ռուսլան Մարտեմյանովը, որը 2015 թվականի հունիսին «Глобальные коммуникации» կազմակերպության հետ պայմանագիր է ստորագրել Վորոնեժ և Բելգորոդ քաղաքներում վերոնշյալ արտիստների մասնակցությամբ երկու համերգների անցկացման վերաբերյալ։ Պայմանագրի համաձայն` Մարտեմյանովը «Глобальным коммуникациям» կազմակերպությանը որպես կանխավճար փոխանցել է ավելի քան 5.5 մլն ռուբլի, սակայն համերգը չեղյալ է հայտարարվել, և Մարտեմյանովը հայցով դիմել է դատարան։
Մոսկվայի արբիտրաժային դատարանը «Глобальные коммуникации» ընկերությունից 5.5 մլն ռուբլի է գանձել` տույժն ու պարտքը մարելու համար։ 2016 թվականի նոյեմբերին Մարտեմյանովը դիմել է «Глобальные коммуникации» ընկերությանը սնանկ ճանաչելու պահանջով։ Մոսկվայի արբիտրաժային դատարանը հունվարի 30-ին այն հիմնավորված է համարել և սկսել է կազմակերպությանը սնանկ ճանաչելու առաջին գործընթացը։ Դատավարությունը նշանակվել է հունիսի 28-ին։
Հիշեցնենք, որ 2016 թվականի մարտի 30-ին հայտարարել էին, որ 2015-2016 թվականների Էրոս Ռամազոտիի համաշխարհային շրջագայության կազմակերպիչները` «Trient Music SRL» ընկերությունը, չեղյալ է հայտարարել Էստոնիայում, Ռուսաստանում և Հայաստանում անցկացվելիք համերգները։ «Trient Music SRL» ընկերությունը հայտնել է, որ այդ երկրներում համերգները չեղյալ էին հայտարարվել «Глобальные коммуникации» կազմակերպչի պատճառով, որը խախտել է պայմանագրով սահմանված պարտականությունները։ Տեղեկությունների համաձայն` հայկական ընկերությունը դատական հայց է ներկայացրել «Глобальные коммуникации» ընկերության դեմ` պայմանագրային պարտավորությունների բազմաթիվ խախտումների համար։
«Глобальные коммуникации» ընկերության փաստաբան Վալերի Պանասյուկն, իր հերթին, սպառնացել է «Trient Music SRL» կազմակերպությանը պատասխան հայց ներկայացնել` հայտարարելով, որ համաձայնագրում «չկա որևէ կետ, որը «Trident» ընկերությանը իրավունք է տալիս Ռամազոտիի որևէ համերգ չեղյալ հայտարարել, առավել ևս` ամբողջ շրջագայությունը։ Պայմանագրի համաձայն` Trident ընկերությունը «Глобальные коммуникации» ընկերությանը միայն տեխնիկական սարքավորումների վարձակալության ծառայություններ է տրամադրում շոուի համար և նման հայտարարություններ չի կարող անել, առավել ևս չկատարել պայմանագրով սահմանված պարտականությունները», — գրված է ընկերության պաշտոնական մամուլի հաղորդագրության մեջ։
Նշենք, որ Երևանում Էրոս Ռամազոտիի չեղյալ հայտարարված համերգի տոմսի արժեքն այդպես էլ չի փոխհատուցվել։
