ԵՐԵՎԱՆ, 21 հունիսի — Sputnik. Էրոս Ռամազոտիի համերգը չեղյալ հայտարարվեց ապրիլի 26-ին։ Այդ օրից ի վեր տոմսեր գնած քաղաքացիները չեն կարողանում հետ ստանալ իրենց գումարները։ Նրանցից մեկը Գայանե Դեմիրչյանն է։ Նա 60 հազար դրամով 4 տոմս է գնել։ Ինչ անում է, չի կարողանում իր վճարած գումարի տերը դառնալ։ Իսկ համերգը կազմակերպող ընկերությունն էլ միշտ նույն պատասխանն է տվել։
«Նրանք ասում են` այս պահին գումար չունենք տալու, քանի որ գովազդի ու դահլիճի վրա մեծ ծախսեր ենք արել»,-ասաց նա։
Տուժածի խոսքով` չկայացած համերգի կազմակերպիչները` «Ֆորպոստարտ» ընկերության աշխատակիցները խոստացել էին գումարները վերադարձնել մայիսի 26-ից հունիսի 26-ն ընկած ժամանակահատվածում։ Մինչև օրս ոչ մի տեղաշարժ չկա։ Տուժող լինելուց բացի, Գայանե Դեմիրչյանը նաև փաստաբան է։ Որոշել է հանձն առնել այս գործն ու դիմել դատարան` պաշտպանելով նաև մյուսների շահերը։ Այս գործընթացը նա անելու է անվճար։
«Ինձ դիմելու համար քաղաքացիները 2 օր ժամանակ ունեն։ Պետք է ներկայացնեն իրենց անձնագրի և գնած տոմսերի պատճենները։ Յուրաքանչյուրը պետք է պատրաստ լինի վճարել իր գնած տոմսի 2 տոկոսի չափով պետական տուրք. սա օրենսգրքով նախատեսված դատական կանոն է։ Եթե դատարանում գործն ավարտվի հաղթանակով, այդ դեպքում պետական տուրքերը կվերադարձվեն»,-ասաց Դեմիրչյանը։
«Իրազեկ և պաշտպանված սպառող» ՀԿ-ի նախագահ Բաբկեն Պիպոյանն էլ ավելացրեց` քաղաքացիները կարող են միանալ «Էրոս Ռամազոտի համերգի տոմսերի վերադարձ» ֆեյսբուքյան էջին կամ զանգահարել 010 430-930 հեռախոսահամարով։
«Եթե անհատական չմիանան, որևէ մեկն իրավասու չէ նրանց փոխարեն պայքարել իրավունքների պաշտպանության համար։ Ավելի քան 40 մարդ է այս պահին միացել։ Խնդիրը միայն այս դեպքը չէ։ Սա պետք է դառնա նախադեպ։ Ինստիտուցիոնալ լծակ պետք է լինի գործադիր իշխանության կողմից։ Բայց այս ամենից զատ, մարդիկ իրենք չպետք է վստահեն նման ընկերություններին»,- ասաց Բաբկեն Պիպոյանը։
Մարտի 30-ին հայտարարվել էր, որ Էրոս Ռամազոտիի` 2015-2016 թվականների համաշխարհային համերգի շրջագայության կազմակերպիչ «Trient Music SRL» ընկերությունը չեղարկել է երգչի համերգները Էստոնիայում, Ռուսաստանում և Հայաստանում։
Ընկերությունը պատճառաբանել էր, թե համերգները դադարեցվել են այդ երկրներում համերգային շրջագայությունների կազմակերպիչ «Global communications» ընկերության` պայմանագրային պարտավորությունները խախտելու պատճառով։ Ըստ ստացված տեղեկությունների` հայաստանյան կազմակերպիչը դատական հայց է ներկայացրել նշյալ ընկերության դեմ։
Բաբկեն Պիպոյանն ու Գայանե Դեմիրչյանը լիահույս են, որ արդարադատության համակարգում կգործի արդարությունը, սպառողների իրավունքներն էլ կվերականգնվեն։ Բանախոսների վստահեցմամբ` օրենքը սպառողների կողմն է։
